Konkluzioni pikant: ç’i bashkon këta shkëlqimtarë të Maturës 2021 në “Hasan Tahsin”

Sarandacity solli ditët e lëna pas disa prej emrave të atyre maturantëve të “Hasan Tahsinit”, të cilët përfunduan gjimnazin me rezultate të shkëlqyera.

Dhe, nga bisedat pikante me ta, doli në pah kualiteti i tyre, ai i moshës, në sinkron me rezultatet në nota.

Në asnjë prej tyre nuk kishte krisje mes shkëlqimit në mësime dhe finesës në komunikim. Ishin mishërime të një modeli që çdo prind dhe çdo shoqëri do t’i donte.

Po flasim së paku deri më tani. Se ç’vjen më pas me ta nuk dihet, por besohet se nuk do kenë devijanca zhgënjyese, sidomos në pjesën më të ndjeshme, karakterin e tyre.

Vitet që do vijnë do jenë sprova e vërtetë për ta e një karakteri të mirëgatuar që në vogëli, që si rezultat të parë ka patur pikërisht ekselencën në shkollën e mesme.

Ajo që duhet theksuar teksa janë prezantuar 6 e ka dhe tre të tjerë në pritje, pasi nuk ndodhen në Sarandë, është një e përbashkët tejet ngacmuese e tyre, fakti që askush prej tyre nuk kishte lidhje të forta me rrjete sociale, pas as të dobëta, thjesht nuk kishin lidhje. Që do të thotë pra se një ndër investimet e tyre në karakter ishte pikërisht qëndrimi larg rrjeteve sociale, si shpenzim kohe po e po, por dhe si një konsum dëmsjellës për mendjen dhe paqen shpirtërore, aq të nevojshme për dijenxënien.

Kështu, prej tyre morrëm një leksion të madh: nëse duam të ecim në jetë, për shumëçka, pavarësisht moshës apo statusit shoqëror, një qëndrim larg rrjeteve sociale veç dobi sjell. /sarandacity.al/