Bashkia Konispol lajmëron të gjithë fermerët që spërkatin me pesticide agrumet gjatë periudhës së lulëzimit, të marrin masa për ruajtjen e bletëve.
Në këtë lajmërim të bërë në faqen e Facebook-ut të kësaj bashkie, thuhet se spërkatja duhet të fillojë pas orës 16:00.
Dhe, siç theksohet, në rast konstatimi jashtë orarit të vendosur do të merren masa administrative.
Për këtë informacion ne kemi kontaktuar me disa bletërritës të zonës dhe ata shprehen të shqetësuar për vendosjen e këtij orari.
Arsyeja e këtij shqetësimi vjen sepse sipas tyre bleta shkon në shtëpi pak para se të perëndojë dielli. Tani pas ndryshimit të orës perëndimi ndodh rreth orës 18:30, prandaj këto masa nuk do të japin rezultatin e duhur në ruajtjen e bletëve.
Kërkesa e këtyre bletërritësve është që të ketë një rishikim të orarit që fermerët mund të fillojnë spërkatjen e agrumeve. /sarandacity.al/
