Huaja e dhënë nga bankat për sektorin e turizmit shënoi rritje në fund të janarit të këtij viti, bëri të ditur Banka e Shqipërisë.
Sipas BSH-së, portofoli i kredisë për sektorin e akomodimit dhe shërbimit ushqimor arriti vlerën 260 milionë euro. Krahasuar me një vit më parë, portofoli i kredisë në këtë sektor është zgjeruar me 23.4%.
Masat lehtësuese të Bankës së Shqipërisë i krijuan mundësinë bankave të ristrukturonin një pjesë të huave ekzistuese në këtë sektor, duke i dhënë frymëmarrje subjekteve gjatë vitit 2020 dhe pjesës së parë të vitit 2021.
Rritja me ritme të larta e portofolit të kredisë dëshmon optimizmin e sektorit në investime të reja dhe qasjen pozitive të bankave në drejtim të mbështetjes së këtyre investimeve.
Vitet e fundit, investimet në turizëm po përfshijnë edhe projekte elitare, por edhe ato në agroturizëm që po zhvillohen më së shumti. Këto investime janë nxitur nga lehtësitë fiskale por edhe të kreditimit. /atsh/
