Kriza e personelit në turizëm: në Sarandë, pagë drejtori për sanitare

Referuar shifrave zyrtare, vendin tonë po e vizitojnë rreth një milion turistë në muaj dhe  parashikohet që deri në fund të vitit të jenë 14 milionë turistë, shkruan Gazeta Shqip.

E në këtë klimë po shihen gjithandej oferta joshëse. Në një prej tyre, për pozicion sanitare, për sezon turistik në Sarandë ofrohet pagesë deri në një mijë euro në muaj, si dhe ushqim dhe fjetje falas.

Por ndërsa këto mund të joshin e gëzojnë këtë kategori, ndryshe pastrueset, për sipërmarrësit kjo përbën dëshpërim.

“Këto janë oferta të dëshpëruara sepse duke mos pasur mundësi ku të gjejnë fuqi punëtore, do të rriten pagat. Por edhe kjo është pak abuzive sepse shteti në këtë pikë nuk i mbron të dyja palët qoftë investitorët apo punëmarrësit. Sepse nëse një investitor nuk gjen mbështetje, por vetëm gjoba e taksa, mënyra nga më të ndryshmet për ta vjelë. Nga ana tjetër, ky punëmarrësi i shkretë mund të marrë këtë rrogë por nuk është i mbrojtur sepse ajo rroga do i deklarohet aq sa i deklarohet. Është zgjidhje afatshkurtër”, thotë  tha Henri Jahaj nga Shoqata e Bareve dhe Restoranteve.

“Neve”, shton ai, “për të nxjerrë një sezon të mirë na duhen mbi 15 mijë punonjës ndërsa për sezon me standart, 25 mijë si shifër do na bënte punë. Kërkohen nga kamarierë, banakierë, ndihmës kamarierë e shefa kuzhine, pastrues, gjithçka. Sivjet, edhe për shkak të motit, jemi të gjithë papërgatitur. Askush nuk e ka vënë ujin në zjarr. Ne vazhdojmë investojmë por problemi ngelet se nuk kemi staf për të punuar në këto subjekte”, ankohet ai, cituar nga Shqip.