Ksamil: njeriut që iu morr plazhi nga një polic, letër opinionit dhe shtetit

Albert Sula, pronar i Castle Hotel në Ksamil, të cilit iu morr një sipërfaqe plazhi të cilën e menaxhonte prej vitesh për t’ju dhënë një tjetri, ka përcjellë një deklaratë për mediat, por dhe si adresim për institucionet e linjës, në kuadër të riaplikimit për përsëritjen e kontratës së njëjtë, si 16 vjet me radhë, për sipërfaqen 1187 m2 të shezlongeve të plazhit në Ksamil.

Riaplikimi është lajmëruar nga vetë ministri Klosi.

Edhe njëherë, Sula bën e dije se çfarë ka ndodhur me atë hapësirë plazhi që menaxhohet prej tij, si pasojë e një vendimmarrjeje me shumë dritëhije.

Deklarata e plotë:

“Në hapësirën publike të plazhit prej 1187 m2 që unë biznesmeni turistik Albert Sula posedoj me kontratë të rregullt me Komunën Ksamil dhe më pas me Bashkinë e Sarandës për 16 vjet dhe që kam investuar shumë në të, në shërbim të pushuesve,  dhe Hotel “Castle” Ksamil, hotel i nivelit bashkëkohor, në mënyrë abuzive, ditën që u hap sezoni turistik, ndryshe nga sa më dërguat konfirmimin zyrtar të 1187 m2 sipërfaqe të shezlongeve, më janë hequr 400 m2 sipërfaqe në zemrën e plazhit, para hotelit tim cilësor, pasi është bërë kjo sipërfaqe në 3 copë, i është dhënë “pjesa e luanit” një uzurpusi polic, Arben Hasanbegaj.

Meqenëse ky polic, këto ditë është evidentuar si problematik prej SHKB-së, dhe momentalisht është transferuar, në funksion të një hetimi penal, sipërfaqa prej 400 m2, i është dhënë në emrin e gruas së tij, Mirela  Hasanbegaj, e cila vetëm me turizmin s’ka patur, as edhe ka ndonjë lidhje.

Për të siguruar këtë përfitim të padrejtë, në kurrizin e biznesit tim 16-vjeçar, përmes një veprimi tepër të dyshimtë, për të cilin po përgatis një kallëzim penal drejtuar SPAK, nën kujdesin juridik të avokatit tim, Zotit Idajet Beqiri, polici uzurpator, pa qënë banor i Ksamilit, ka marr me qira një objekt me 10 tavolina, dhe megjithëse nuk plotëson asnjë prej kritereve për dhënien e një sipërfaqe për stacion plazhi, domethënë në kushtet primitive “fshati në festë”, në mënyrë më të dukshme korruptive, mori në një kohë rekord kontratën e plazhit me sip. 400 m2(!?).

Duke mos u pajtuar me këtë aferë korruptive, për shkak se kam investuar për gjithë familjen time, duke investuar për arsimimin e lartë të tre fëmijëve të mi, duke investuar për vendin tim të shtrenjtë, pasi para 16 vitesh i solla në Ksamil gjakun dhe djersën shumvjeçare të punës në Greqi, duke patur të punësuar dhe të siguruar për viite me radhë deri 25 punonjës, me gjithë 4 pjestarët e familjes time, duke qënë një takspagues shumë i rregullt ndër vite, duke qënë se i plotësoj të gjitha kushtet dhe kriteret që kërkon Ministria e Turizmit si Çertifikatë Kategorizimi, Strukturë Akomoduese, Çertifikatë e Përdorimit të Stacionit të Plazhit, Bar-Restorant & SPA etj., kërkoj prej jush që të mos më prekni kontratën 16-vjeçare dhe t’më riktheni 400 m2 sipërfaqe të plazhit, të cilat ju dha në kundërshtim me ligjin dhe në rrugë abuzive policit problematik Arben (Mirela) Hasanbegaj.

Kam zgjedhur rrugën ligjore, rrugën e qytetarise për zgjidhjen e problemit, pavarësisht se uzurpatori dhe ata që plotësuan aferën korruptive të tij, kanë zgjedhur “rrugën e Velipojës” me 4 të vrarë.

Jam në pritje të vendimarrjes ligjore dhe të drejtën, tuajën.

Me respekt

Albert Sula, Ksamil”. /sarandacity.al/