Korrespondenti i TCH në Greqi, njëherësh kolegu Artur Bibe, ofroi një pasqyrë të asaj se ç’po ndodh në pikat e kalimit pas shpalljes së “hapjes së kufijve” nga ana e Athinës zyrtare, si dhe ç’pritet të ndodhë me Korfuzi, nëse do hapet dhe komunikimi ujor mes dy fqinjëve, po aq i kërkuar dhe impaktiv në raportet mes dy vendeve.
Në një raportim për TCH, Bibe tha:
“Autoritetet deri tani përsëritën dhe një herë vendimin e tyre se është hapur pika kufitare e Kakavijës për 1500 persona, të përfshirë këtu edhe personat që vijnë për qëllime turistike në Greqi. Si dhe pika kufitare e Qafë-Botës funksionon me një kuotë për 250 persona. Ngelet në fuqi situata lidhur me Kapshticën dhe me Portin e Sarandës.
Autoritetet greke thonë se gjatë ditëve në vazhdim dhe këta nuk e kanë të qartë se çfarë po ndodh. Do të shkojnë dhe qarkoret e fundit sqaruese lidhur me çfarë duhet të ndodhë në kufi. Aktualisht çdo qytetar që dëshiron të vijë në Greqi duhet të ketë me vete: ftesën nëse një familjar i tij e fton në Greqi ose rezervimin e hotelit, duhet të bëjë procedurën e COVID siç është Rapid Test, i cili mund të kryhet nëpër pikat kufitare të kalimit ose në Aeroportin e Tiranës. Gjithashtu duhet të ketë me vete formën FLP të plotësuar jo më vonë se 24 orë para udhëtimit.
Autoritetet greke na thanë se rreth datës 28 me 30 qershor, ende nuk e kanë të qartë datën, pasi ende nuk është vendosur fiks data, do të hapet përfundumisht për të gjithë udhëtarët dhe pika kufitare e Kapshticës. Ndërkohë autoritetet na thonë se janë duke sqaruar çështjen e autobusëve shqiptarë të cilët nuk lejohen, por kjo është një procedurë teknike që e ka dogana greke e Kakvijës, pasi drejtoresha aty është me pushime dhe ajo nuk ka mundur të hapë e-mailet në të cilat jepet urdhri për lëvizjen e autobusëve. Deri në orët e para të ditës së nesërme, do të ketë një version zyrtar se çfarë do të ndodhë me autobusët shqiptarë që (s)kalojnë në kufi.” /sarandacity.al/
