Kufiri shqiptaro-shqiptar: Po tani, a mund të akuzohen grekët si racistë?

Duke komentuar një radhë të pazakontë në Morinë, pra kufirin mes Shqipërisë dhe Kosovës, gazetari Mentor Kikia e ka quajtur të paarsyeshëm konsiderimin si racist të asaj çfarë ndodh hera-herës në pikat e kalimit kufitar me Greqinë.

“Ky është kufiri shqiptaro-shqiptar në Morinë. Natën e 30 gushtit u raportua për radhë deri në 10 kilometra të gjata. Fluks i madh qytetarësh kosovarë që kthehen nga pushimet në Shqipëri, por edhe qytetarë shqiptarë që shkojnë në Kosovë. Qeveria e Prishtinës ka marrë masa anti-COVID, para të cilave njerëzit që ishin në udhëtim janë gjendur të papërgatitur.

Kur shikojmë të tillë radhë të gjata në Kakavijë e Kapshticë, ne akuzojmë grekët si racistë. Po këtu kush janë racistët?

Në 20 vjet që funksionojnë dy shtete shqiptare, nuk mundëm dot të lehtësojmë asgjë në lëvizjen e mallrave dhe të njerëzve.

Dy qeveritë, në Tiranë dhe Prishtinë, janë të kapin hunjtë e jo të bashkëpunojnë edhe duke rakorduar masat anti-COVID që njerëzit të mos dergjen rrugëve, pas pikave kufitare absurde, të cilat duhet t’i kishim shndërruar me kohë në formalitete administrative.

Kur shikon këto pamje, kupton se sa hiporktie dhe sharlatane janë histeritë nacionaliste, me flamuj kuqezi, që kërkojnë bashkimin kombëtar.

Serbë, grekë e malazezë, e kush dreqin tjetër trembet nga Shqipëria e Madhe. Mos u shqetësoni, ata që nuk e duan bashkimin e Shqipërisë me Kosovën, janë vetë shqiptarët dhe kosovarët në radhë të parë”, shkruan gazetari i njohur kritik, aktiv në rrjetet sociale. /sarandacity.al/