Kujdes! Nëse ju bie rruga nga aksi Stjar-Delvinë, mund ta pësoni keq

Kush do ketë rastin këto ditë që të kalojë me automjet në aksin Stjar – Delvinë të ketë parasysh se para do i dalin ca të papritura rrugore. Fjala është për gunga rrugore për efekt ndalim shpejtësie në zonat e banuara, tre-katër të tilla, të ngritura së fundi gjatë nja asfaltimi të pjesshëm të rrugës.

Kanë qenë dikur, në fakt me litar, këtu e mbi 10 vite më parë, por tashmë janë dhe më të egra si gunga, ose ndryshe kurrize, pasi mund  ta ngrejnë automjetin hava nëse nuk merren në konsideratë.

Dhe në fakt nuk po merren për arsyen e thjeshtë, pasi nuk ka asnjë paralajmërim për to. Të mësuar 10 vjet pa këto pengesa rrugore, këto ditë kanë qenë me supriza të hidhura për çdokënd që ka kaluar aty, duke provuar trandjen e frikshme të makinës. Shumë sosh majde kanë nisur dhe t’u shmangen, duke dalë jashtë rruge në atë pjesë të kurrizit.

Sipas policisë rrugore, urdhëri për to është dhënë nga Mirëmbajtja Rrugore në Gjirokastër, me pretendimin se nuk ka tabela që lajmërojnë zonë të banuar.

Në fakt tabela ka, por dhe nëse do duheshin, këto gunga, karakteristike të viteve më parë kur nuk dihej se ç’formë tjetër përdorej per to, janë pikërisht ato që krijuar apostafat për ulje shpejtësie, fasha gome, ku edhe shpejtësia ulet e gjithashtu as makina nuk dëmtohet.

Gjithsesi, kujdes! /sarandacity.al/