Nga Çim Beqaj, një personazh i njohur i Sarandës, vjen sinjali që me ardhjen e sezonit parkimi do jetë sfida më e vështirë, do prodhojë – mos qoftë e thënë – edhe konflikte sociale.
Atij, edhe pse është një qytetar i njohur, nuk i janë kursyer gjobat e njëpasnjëshme për parkim të gabuar. Por Çimi nuk e pranon këtë verdict policor.
Ai shprehet se prej 20 vitesh e ka parkuar makinën në rrugën e Parë, para hyrjes së apartamentit të tij. Por prej tri ditësh ai është gjobitur me pretendimin se ka parkuar në një vend të rezervuar për një biznes.
Edhe pse është gjendur fizikisht në momentin e gjobvënies, Beqaj pretendon polici i gjendur aty nuk i ka dhënë një shpjegim lidhur me vendosjen e gjobës.
Përballë këtij biznesi është e vendosur një tabelë në të cilën shkruhet: Parkim i Rezervuar, 3 vende.
Pas komunikimit që kemi patur me pronarin e biznesit, ai është treguar i gatshëm të na tregojë një dokument në të cilin na fakton se ka paguar në Bashkinë Sarandë për të pasur 3 vende parkimi të rezervuara. Ky subjekt ka rinovuar një kontratë prej datës 2 qershor 2021. Atëherë ku qëndron problemi?
Pas lidhjes së kësaj kontrate duhet të realizohen tabelat Sinjalistike Vertikale (2 copë, fillim-fund) dhe të kryen vijëzimet dhe vendosja e tabelave.
Në këtë rast ajo që mungon janë vijëzimet.
Ndërkohë një shqetësim tjetër vjen nga qytetarët dhe për parkimin në vend public, pasi individë që jetojnë aty pranë ose kanë një biznes e vendosin karrike, ose “rrufepritëse” me hekur e beton. /sarandacity.al/
