Kryebashkiaku Gurma, doktor me profesion, është detyruar së fundi të flasë së fundi për lidhjen e tij me rrobën ushtarake. Ka ndodhur kjo në një takim që ai pati me disa kursantë të fushës së sigurisë, ardhur nga disa vende të NATO-s, por dhe nga Gjeorgjia dhe Kosova, ende jo anëtare të Aleancës. 
Ata po vizitojnë disa qytete të Shqipërisë, duke zgjedhur dhe Sarandën turistike.
Dhe, siç shkruhet në raportimin e Bashkisë, kryebashkiaku u ka rrëfyer dhe një kolonë ushtarake në familjen e tij, të atin, të shumënjohurin nga shumëkush në gjithë Jugun, Komandant Anastas Gurma, me emrin e të cilit identifikohej lehtë dhe i biri në kohën e përfoljes si kandidaturë për kreun e Bashkisë Sarandë.
“Për 12 prej pjesëmarrësve në Kursin e Lartë të Sigurise, Kryetari i Bashkise se Sarandës, Adrian Gurma, ka rezervuar një pritje të veçantë në mjediset e institucionit.
Në përbërje të grupit ishin edhe përfaqësues nga Komanda e Doktrinës dhe e Stërvitjes në Shqipëri, si dhe zonja Alma Mele, drejtore e Çështjeve vendore dhe Prefekturave në Ministrinë e Brendshme.
Zonja Mele foli për rëndësinë e prezencës së Kursit të Sigurise dhe Mbrojtjes, duke prezantuar përfaqësuesëit e pranishëm nga vende të ndryshme të Aleances Atlantike(NATO), si: Gjermani, Itali, Bullgari, si dhe nga vendet partnere që bashkëpunojnë ngushtë me NATO-n, si: Gjeorgjia dhe Kosova.
Kreu i Bashkise Gurma tha se i pret jo vetëm në këtë cilësi, por edhe si biri i një ish-ushtaraku karriere, që ka mbajtur gradën kolonel dhe me respektin me të cilin është rritur për misionin e ushtarakut.
Ai tha se Kurse të tilla i shërbejnë jë vetëm rritjes së Sigurisë, në kuadër të NATO-s, por janë edhe një mundësi për të njohur kulturat e njëri-tjetrit. Ai i ftoi të pranishmit në takim ta shijojnë Sarandën, të përçojnë frymën e mirë që refekton ky qytet dhe të kthehen si pushues në raste të tjera.
Surprizë e bukur ishte një shishe vere me etiketimin ‘Komanda e Doktrinës dhe Stërvitjes, Shqipëri’, që Kolonel Emëror Hajdarasi i dhuroi Kryebashkiakut Gurma.
Ai nga ana e vet, u dhuroi të pranishmeve albumin e ekspozitës ‘Artistët për Gratë’, çelur këtë 8 mars në Galerinë ‘Art-Saranda’, me 100 piktura, nga 100 autorë të hapësirës shqipfolëse, në vitin e 100-vjetorit të Bashkise së Sarandës”, thuhet në raportimin e Bashkisë.
Ata më pas vizituan dhe Butrintin. /sarandacity.al/
