Arkivat Shqiptare kanë kujtuar motrat e Mbretit Zogu, ku në dy foto është prania tyre, jo të gjithave, në Gjirokastër, madje dhe në Dropull, përgjatë një vizite në Jug, aty nga viti 1937.
Ky vit lidhet dhe me gjurmën e tyre në Sarandë, e cila është xhamia kryesore në qendër të qytetit, e cila daton në këtë vit dhe që thuhet se u financua pikërisht prej tyre.
Ja ç’shkruhet për to:
“Mbreti Zog kishte 6 motra. Ato ishin Princeshat Adile, Nafije, Senije, Myzejen, Ruhije dhe Maxhide.
Në një Shqipëri që po përpiqej të ikte nga orienti e të shkonte drejt oksidentit, ato qenë të parat që dolën në plazh me kostume banje evropiane.
Po fati në dashuri dhe jetën bashkëshortore nuk është se u ka ecur shumë, përveç Princeshës Adile, e cila u martua me Emin Bej Agolli-Doshishti dhe patën tre djem dhe dy vajza. Ajo iu përkushtua familjes dhe jetuan në Angli. Vitet e fundit të jetës i kaloi në Paris pranë djalit të saj të pamartuar, Salihut.
Nga ana tjetër, Princesha Nafije u martua me Ceno Bej Kryeziun me të cilin pati një djalë Esatin (Princ Tati) por i shoqi u vra në 1927-tën, e pas vdekjes së tij, Princesha se bashku me të birin jetuan në Familjen Mbretërore, nga e cila nuk u ndanë as në ekzil.
Princesha Senija u martua me Princ Mehmet Abid të Turqisë, djalin e Sulltan Abdulhamid II, por u divorcuan.
Nuk patën femijë, ndërsa pjesën tjetër të jetës ajo e kaloi me vëllain dhe motrat Myzejenin, Ruhijen dhe Maxhiden, të cilat nuk u martuan asnjëherë dhe deri në fund të jetës qëndruan në Familjen Mbretërore”. /sarandacity.al/
