Kush janë përkrahësit e mbetur të Bashës?

Ndërsa ka mbetur vetëm mes thirrjesh për t’u dorëhequr, pra dhe nga përkrahës të tij deri dje në lidership, Basha duket se po ka krah vetëm vartësit e tij në rrethe.

Nga një mbledhje e fundi me ta, pra me krerët lokalë të PD-së, ose ndryshe me Kolegjin e kryetarëve, nuk ka dëgjuar nga këta të fundit që ti thonë “Dorëhiqu”, siç vepruan këto ditë pothuajse të emrat nga grupi parlamentar demokrat.

“Unë nuk jam që dorëheqja të jetë zgjidhje”, mësohet të ketë thënë Vesel Koçia, kreu i degës së Sarandës.

PD morri një rezultat katastrofik në Lokalet e pjesshme të 6 marsit, duke mos fituar asnjë prej 6 bashkive, njëherësh duke dalë më keq se PD-ja e Berishës, ndryshe Rithemelimi.

Basha ia faturoi situatën e rëndë jo vetes por Berishës, duke thënë se “këtu nuk ndodhemi prej gabimeve por për shkak të vendimit të 9 shtatorit”, pra ditës kur morri vendimin për pezullimin e Berishës nga grupi parlamentar.

Por aty, Basha hodhi poshtë idenë e një ribashkimi të dy pjesëve të ndara të PD-së, ose më saktë mes tij dhe Berishës.

“E kuptojmë se nuk kemi shans me një ‘non grata’”, deklaroi ai para vartësve. Megjithatë, ai ftoi gjithsesi në bashkim. “9 shtatorin nuk e zhbëjnë dot nëse nuk duam të zhbëjnë PD. Duhet të tregojmë mençuri, të bashkojmë PD, që të arrijmë sukses elektoral”, tha ai.

Basha ripërsëriti frazën stereotipe të këtyre ditëve: “Unë në shërbim të zgjidhjes kam vënë në dispozicion gjithçka”, vështirë për t’u përkthyer politikisht se çdo të thotë të “vësh në dispozicion gjithçka”, ndërkohë që përjashton kategorikisht të ofroj dorëheqjen, siç i kërkohet këmbëngulësisht. /sarandacity.al/