Ndodh gjithnjë e kudo në Shqipëri, pritet të ndodhë dhe në Finiq. Ndërsa ne të këtushmit jemi ftohur me vendin tonë e duam t’ja mbathim, të huajt, deri amerikanë, shohin të ardhmen këtu.
Siç njoftohet nga Frida Krifca e Agjencisë së Zhvillimit Bujqësor dhe Rural, një çift nga Kalifornia pritet të investojë në agroturizëm në Finiqin deri diku të braktisur.
“Me Kyle dhe Shawn, dy kalifornianë që kanë rënë në dashuri me Finiqin dhe Sarandën ku dhe kanë vendosur të ndërtojnë një botë të re e t’i japin një entuziazëm ndryshe zonës rurale.
Ata po hedhin themelet e një tjetër strukture agroturisike të mundësuar nga bashkëpunimi me #AZHBR nëpërmjet programit #IPARD.
‘Botë Farm’ do të shërbejë me një koncept komunitar ku vizitorët e kultivojnë fermën dhe marrin pjesë në proceset e punës. Bujtina do të ketë shtëpiza akomoduese prej druri tradicionale dhe shërbime të turizmit rural.
Të tilla projekte diversifikimi ferme sjellin të tjera mundësi punësimi, shërbimi e mirëqënie në Sarandën rurale”, shkruan Krifca në faqen e saj. /sarandacity.al/
