Anthony Fauci, eksperti kryesor amerikan për sëmundjet infektive, tha të dielën se ai mbështet vaksinimin e detyrueshëm të fëmijëve të shkollave kundër virusit COVID-19, në një kohë kur varianti Delta i koronavirusit po rrit shumë numrin e rasteve të infeksionit në Shtetet e Bashkuara.
“Unë besoj se të kërkosh që fëmijët e shkollës të vaksinohen është një ide e mirë,” tha Fauci për CNN. “Ne e kemi bërë këtë për dekada, duke kërkuar vaksinime kundër poliomielitit, fruthit, shytave, rubeolës dhe hepatitit,” theksoi ai.
Në këtë kohë, fëmijët nën moshën 12 vjeç ende nuk janë vaksinuar kundër koronavirusit. Por Fauci tha në një intervistë tjetër se deri në fillim të tetorit, duhet të ketë të dhëna të mjaftueshme për Administratën Amerikane të Ushqimit dhe Barnave (FDA) për të marrë parasysh vaksinimet nën këtë moshë.
“Unë mendoj se ka një shans të arsyeshëm që Pfizer-BioNTech ose Moderna të marrë miratimin e FDA për të vaksinuar fëmijët nën 12 vjeç,” tha të martën Fauci, drejtor i Institutit Kombëtar të Alergjisë dhe Sëmundjeve Infektive dhe këshilltar kryesor mjekësor në Shtëpinë e Bardhë. /sarandacity.al/
