Dy ish-kryebashkiakë të Sarandës u shfaqën krah njëri-tjetrin në një event kulturor në Galerinë Saranda, me shkak një libër nga ish-zëdhënësi i tyre.
Thoma Nika, ndër gazetarët më të njohur të Sarandës në më në shumë se tre dekada, zëdhënës i katër kryebashkiakëve radhazi, promovoi librin e tij të parë publicistik “Të pangjashmit”, aty ku ofrohen portretet e 101 sarandiotëve, individë me statuse të ndryshme sociale, fate të ndryshme, profesione të ndryshme, e sigurisht veçantive të spikatura te secili prej tyre; pra, pasuria njerëzore e një qyteti.
Ishte ndër ceremonitë promovuese me më shumë pranishmëri të madhe në sallën e Galerisë, event që pasoi atë të para pak javëve, ku një tjetër emër i njohur i gazetarisë sarandiote, Shkëlqim Hajno, promovoi librin novelistik “Hebreu i fundit”, duke sprovuar veten kësisoj në lëmin e letërsisë artistike, pas vitesh karriere të ethshme gazetareske.
Të tillë e ka karrierën dhe Thoma Nika, aktualisht në pension zyrtar, por me një energji të pazbehur e të pashtershme për të vijuar gazetarinë, tashmë dhe në nivel publicistik, si të qe fiks djalë i ri.
Në një shkrim në FB mbi eventin promovues, vetë autori shpjegon veprën e tij:
“Çdo njeri prej 101 profileve i ofrohet lexuesit me të pazakonshmen dhe të pangjashmen e jetës së tij, brenda të zakonshmes sonë.
Kjo është në thelbin dhe në arësyen e të shkruarit dhe të botuarit të librit ‘Të pangjashmit’.
Dhe së fundmi, tregova atë që kam përjetuar në procesin e përgatitjes për botim të librit. Thash se disa herë më është dashur të prish strukturën e librit, për shkak të presionit pozitiv që më vinte nga e përditshmja.
Për një gjë krijova bindje: që sa më intensivisht ta përjetosh realitetin, aq më shumë ai ofron profile dhe modele njerëzish, që për çdo gazetar shërbejnë si ngacmim dhe japin indicie për të hyrë dhe për të rrëfyer historinë e tyre njerëzore.
Sigurisht që për këtë nuk mjafton të udhëtosh, por t’i vësh në punë të gjitha shqisat dhe të përfshihesh në historinë njerëzore ku has.
Do të doja ta mbyllja duke thënë se, nëse Fakulteti i Gazetarisë më mësoi si të shkruaj, eksperienca e punës në redaksi apo e bashkëpunimit me gazetat, më mësoi si të mos shkruaj. Në sensin si të mos gaboj, si të mos nxitoj e të mos spekulloj me fjalën e shkruar apo të folur, si të bëj diferencën mes dukjes dhe thelbit dhe si të gdhend me fjalën…”, shkruan Thoma Nika, me treguesin më unik në gazetarinë shqiptare, të qënit në vite zëdhënës i katër kryebashkiakëve, pa u shkëputur për asnjë çast nga gazetaria klasike, ajo e terrenit dhe njeriut, për shkak të pozicionit zyrtar.
Një falenderim ai ka dhe për kolegët e tij në profesion teksa shkruan: “Duke qenë një libër publicistik, kjo bëri më të interesuar mjaft prej kolegëve të mi gazetarë: Shkëlqim Hajnon e Shpresa Dinen, Agron Memën e Vangjel Papakriston, Panajot Bolin e Sofokli Mekshin, por edhe gazetaret e brezit më të ri: Silvi Sula e Anxhela Lushkaj. Të gjithë i falenderoj shumë”. /sarandacity.al/
