Nga Drimadhes në Dhërmi, ministrja e Shëndetësisë Ogerta Manastirliu, pasi ka inspektuar sot qendrën verore të atyshme, një nga 29 qendrat shëndetësore verore të hapura për pushuesit përgjatë zonave turistike, tha se kështu u ul fluksi në spitale këtë sezon.
“Janë më shumë se 29 mijë qytetarë të cilët kanë marrë shërbime në qendrat shëndetësore verore, 8 mijë prej tyre janë turistë të huaj që kanë ardhur dhe kanë aksesuar shërbimin shëndetësor në territor gjatë periudhës së sezonit turistik, që nga momenti që i kemi hapur këto qendra në 15 qershor e deri më tani,
Ajo çfarë na tregon programi i hapjes se qendrave verore shëndetësore është se ka reduktuar fluksin në spitale. Nga 29 mijë qytetarë që kanë marrë shërbime, me pak se 3% e tyre janë referuar në spitale, që do të thotë se qytetarët kanë marrë shërbimin e kërkuar në këto qendra”, tha Manastirliu.
Ajo më pas i mëshoi nevojës për vaksinim tashmë që rastet e infektimeve po rriten sërish.
“Në Shqipëri kemi 1.8 million doza të mbërritura të vaksinave të ndryshme të cilat janë efektive, ndaj dua të ftoj qytetarët të shfrytëzojnë muajin gusht, ku tashmë vaksinimi +18 vjeç po vijon dhe vetëm në 13 ditët e para janë më shumë se 100.000 vaksinime të kryera”, tha Manastirliu. /sarandacity.al/
