Masat e reja të Greqisë: “pa mëshirë” me të pavaksinuarit

Qeveria greke, e përballur me një rritje të numrit të të infektuarve me koronavirus, njoftoi të martën se po prezanton një test të detyrueshëm negativ PCR ose antigjen për këtë virus për personat e pavaksinuar për të hyrë në ambientet e administratës publike, dyqane apo banka. Kjo masë hyn në fuqi nga e shtuna.

Punonjësit në sektorin privat dhe publik që nuk janë vaksinuar do të duhet të tregojnë test negativ për COVID-19 dy herë në javë, të cilin duhet ta paguajnë vetë. Gjobat për dyqanet dhe restorantet që nuk respektojnë masat e qeverisë janë dyfishuar në 5000 euro.

“Arma jonë kryesore kundër pandemisë është vaksina”, tha ministri i Shëndetësisë Thanos Plevris.

Rekomandohet doza e tretë e vaksinës

Ministri u sugjeroi gjithashtu të gjithë personave që kanë marrë dozën e dytë të vaksinës më shumë se gjashtë muaj më parë, që të vaksinohen me dozën e tretë, përforcuese.

Deri më tani, sipas Ministrisë së Shëndetësisë, 63 për qind e popullsisë së përgjithshme të Greqisë është vaksinuar.

Vendi evropian regjistroi të martën 6,700 raste të reja të infektimit me koronavirus në 24 orë, që është një rekord që nga fillimi i pandemisë, dhe 59 njerëz vdiqën. /sarandacity.al/