Spiro (Jorgo) Noni është ndër ata shoferë legjendarë të Sarandës, një jetë në timon.
Ai ka lindur më 7 korrik 1935 në Pecë të Delvinës dhe sot ka ditëlindjen duke mbushur plot 86 vieç.
Spirua vazhdoi gjimnazin dhe mbaroi shkollën e Rezervave të Punës në Vlorë, ku mori zanatin e saldatorit.
Në shërbimin ushtarak që kreu në vitin 1955 vazhdoi kursin 1-vjeçar për shofer dhe që nga ajo kohë nuk ju nda timonit.
Ka punuar shofer në Pogradec dhe më vonë në Sarandë në Armën e Kufirit dhe në Ndërmarrjen Ushqimore.
Në vitin 1964 filloi punë si shofer në Parkun Automobilistik në Sarandë deri në vitin 1989, kur u shkri si ndërmarrje.
Pas vitit 1990 e ushtroi zanatin e shoferit, por ketë rradhë për të plotësuar dëshirat e tij personale.
Spirua njihet si një tifoz shumë i flaktë i ekipeve sportive të Butrintit dhe, si mik i ngushtë i Vangjel Çakulit, kurrë nuk përtonte që t’u shërbente atyre me makinën e tij kudo nëpër republikë.
Krahas timonit, i pëlqente shumë të lexonte, sidomos literaturë historike. Kur e pyetëm se ku e gjente kohën për të lexuar, ai na u përgjigj: “Kur mbaja rradhën me makinë, unë hapja librat dhe lexoja, kurse ç’do darkë e kisha si rregull që do të lexoja një orë”.
I pëlqejnë shumë këngët polifonike dhe sazet e Përmetit.
Nostalgji ka për vallen e kënduar “Për ato sytë e tua të bukura”.
Spiro Noni ka tre djem dhe dy meraqe: e para ka të bëjë me bukurinë e humbur të Sarandës pas vitit 1990 dhe e dyta që nuk ka shkuar prona tek i zoti.
Sarandacity, në ditën e sotme që përkon me ditëlindjen e tij i uron Spiros të ketë jetë sa më të gjatë dhe të lumtur. /sarandacity.al/
