Me argument nga Infektivi, tjetër apel qeveritar për vaksinim masiv

Ministrja e Shëndetësisë Ogerta Manastriliu përcolli tjetër apel për vaksinim masiv, pikërisht tashmë që dhe vaksinat janë vënë në dyshim nga varianti Delta.

“Fokusi është tek vaksinimi i çdo qytetari +18 vjeç. Ndaj ne jemi duke krijuar mundësinë që edhe në ato pika të ofrimit të kujdesit shëndetësor siç janë poliklinikat, tashmë të kemi hapur pikat tona të vaksinimit.

Padyshim ne do të vazhdojmë që ta konsiderojmë jo vetëm çdo ditë, por sidomos muajin shtator, një muaj vendimtar për të rritur mbulesën vaksinale, duke qenë se jemi afër hapjes së shkollave, më tej universiteteve”, u shpreh Manastirliu.

Manastirliu theksoi se çdo i pavaksinuar përbën një kosto për jetën dhe shëndetin e vetes, duke i qëndruar kartës aktuale mjekësore se vaksinimi gjithsesi po frenon rastet e rënda.

“Çdo i pavaksinuar është një kosto jo vetëm për jetën dhe shëndetin e vetvetes, por gjithashtu edhe për familjarët, për shoqërinë. Është një kosto për sistemin shëndetësor.

Duhet të kuptojmë që në Infektiv kemi 95% të rasteve, mes tyre janë edhe raste të rënda, që janë të pavaksinuar.

Pikërisht fakti që janë të pavaksinuar dhe janë në një gjendje të rëndësuar shëndetësore është një arsye më shumë që të gjithë qytetarët të vaksinohen sa më shpejt, pa humbur kohë, për të mbrojtur jetën, shëndetin, për të ulur risqet dhe pasojat që sjell mungesa e vaksinimit”, argumentoi Manastirliu. /sarandacity.al/