Me pamjet e prishjeve të fundit në Ksamilit nga IKMT, ministri Çuçi lëshoi përbetimin e radhës për vijimin e operacionit “Bregdeti ynë”, duke bërë dhe një bilanc të deritanishëm.
“Inspektoriati Kombëtar i Mbrojtjes së Territorit vijon operacionin ‘BregdetiYnë’. Vetëm gjatë muajit shtator kur ky operacion rinisi pas sezonit veror, janë shembur mbi 60 objekte të ndërtuara pa leje apo në shkelje flagrante të lejes në bashkitë Vlorë, Himarë e Sarandë”, shkruan Çuçi.
Siç shkruan më pas ai, “kush ka menduar se ishte thjesht një aksion, me siguri do të jetë zhgënjyer po aq sa ata që i ngritën këto objekte në shkelje të ligjit dhe tani duhet të përballen me pasojat”.
“Do të pastrojmë të gjithë territorin e vendit, vijën bregdetare po e po siç nisëm në qershor, nga zaptuesit që duhet ta mësojnë njëherë e mirë se ka perënduar koha kur gjeje shesh e bëje përshesh nën hundën e shtetit. IKMT dhe Policia e Shtetit bashkë me institucionet e tjera po punojnë ndërkohë të evidentojnë objekte pa leje edhe në zonat e mbrojtura dhe akset rrugore kombëtare, të cilat do të shemben pa as më të voglin hezitim”, përfundon i pari i rendit. /sarandacity.al/
https://youtu.be/IDHi-xxIUF0
