Media fqinje: 37 veto Shqipërisë për Belerin

Kryeministri shqiptar Edi Rama zgjodhi “kundërshtarin” e gabuar për të demonstruar forcë dhe intransigjencë me rastin e çështjes Beleris, pasi Athina në çdo mënyrë i përcolli Brukselit se përderisa z. Beleris nuk njihet si kryetar i zgjedhur i Bashkisë Himarë, dera e Bashkimit Evropian për Shqipërinë do të mbetet e mbyllur, shkruan kështu Protothema

Kryeministri shqiptar, duke iu referuar gjyqësorit të “pavarur” shqiptar, deklaroi me sfidë se asgjë nuk do të ndryshojë edhe nëse “bie i gjithë Këshilli Europian” dhe gjykata, pas deklaratave të tij publike, hodhi poshtë kërkesën e Fredi Beleris që të betohet si kryetar bashkie, ndërkohë që pritet vijimi i gjyqit për skemën e pretenduar të blerjes së votes, vijon më tej kjo media.

Sipas saj, përvetësimi i pronave greke me pretekstin e zhvillimit turistik të Himarës dhe rreziku i ekspozimit të skandaleve të anëtarëve të qeverisë dhe miqve të “biznesmenëve” të Ramës nga një autoritet bashkiak i pavarur, por edhe karakteri dhe temperamenti i kryeministrit shqiptar, e çojnë në këtë përballje frontale me Greqinë.

Në Bashkimin Europian klima është negative për rastin Beleris, pasi europianët, pasi kanë hapur fronte të tjera me kandidaturën e Ukrainës dhe Gjeorgjisë, nuk duan sërish raste të dhimbshme vetoje mes vendeve të Ballkanit Perëndimor.

Por Athina kujton se do të ketë 37 veto për hapjen dhe mbylljen e kapitujve të negociatave të anëtarësimit.

Edi Rama, i inkurajuar nga qëndrimi i evropianëve që e konsiderojnë çështjen e Belerit si një çështje dypalëshe, beson se Greqia do të përkulet ndaj presionit të partnerëve të saj dhe po investon në lodhjen e një përballjeje ku ai mban çelësin.

Për Athinën, megjithatë, tani çështja Beleris, pasi qeveria zgjodhi të përfshihej aktivisht, është një çështje që ka të bëjë jo vetëm me mbrojtjen e të drejtave të pakicës kombëtare greke, por edhe me besueshmërinë dhe prestigjin e tij në rajonin e Ballkanit. Dhe kjo është arsyeja pse bllokimi i rrugës evropiane të Shqipërisë është një rrugë njëkahëshe, përfundon Protothema. /sarandacity.al/