Në 210-vjetorin e lindjes e njëherësh 140-vjetorin e ndarjes nga jeta të Hasan Tahsinit, figurës më të madhe rilindase që ka nxjerrë Saranda, nga Akademia e Shkencave u organizua një aktivitet jubilare në nderim të tij.
Ndër kumtuesit kryesor qe akademik Rexhep Mejdani, sipas së cilit, ai qe ndër “motorët” e Rilindjes.
“Hasan Tahsini besonte tek arsimi, dija e shkenca, tek gjuha e dituria si elementë kyç në zgjimin e një populli. Ushqyer nga ky besim, ai, së bashku me rilindës të tjerë shqiptarë, iu bashkua lëvizjes për ndërgjegjësim kulturor e politik, për zgjim e çlirim kombëtar, madje duke u bërë kështu dhe një nga ‘motorët e Rilindjes Kombëtare.
“Ai ishte, po ashtu, një nga të parët që hartoi një alfabet për gjuhën shqipe”, theksoi Mejdani, duke veçuar faktin se “Hoxha Tahsini mbetet shqiptari i parë që organizoi dhe drejtoi një universitet ndërkombëtar – atë osman, krahas dy qendrave të rëndësishme për kulturën e dijen shqiptare”.
Siç dihet, Hasan Tahsini lindi në Sarandë. Ai ishte rilindas, filozof, dijetar e atdhetar i Rilindjes Kombëtare. Themelues i të parit universitet shtetëror në sulltanatin osman si dhe i “Xhemijet-i Ilmijje-i Arnavudijjê” (Shoqëria e Dijetarëve Shqiptarë apo Kuvendi Shkencor Shqiptar). Ishte ndër të parët që mbolli dhe përhapi në masë mendimin e krijimit të shtetit të pavarur shqiptar. /sarandacity.al/
