Me iniciativën e ambasadës greke në Tiranë, misioni i parë mjekësor në fshatrat e Bashkisë së Finiqit me mjekë nga Greqia dhe Tirana u realizua plotësisht.
Në 21 maj, grupi i mjekëve bëri vizita në qendrën mjekësore të Livadhjasë, ku u vizituan disa banorë të atyshëm dhe zonës përreth.
Ditën tjetër, ekipi i mjekëve i shoqëruar nga Konsulli i Përgjithshëm i Gjirokastrës Dimitrios Sacharidis, mjeku dhe deputeti në pritje Niko Kuri, si dhe Kryetari i bashkisë së Finiqit Kristaq Kiço, vazhduan vizitat në fshatrat malore të Karoqit, Zminecit dhe Grazhdanit.
Banorët e këtyre fshatrave, të cilët për herë të parë u ofrohet një shërbim kaq i menjëhershëm dhe falas për problemet shëndetësore me të cilat përballen, i shprehën mirënjohjen konsullit, deputetit dhe kryetarit të bashkisë si dhe ambasadës greke, që siç thanë ata, mendoi dhe realizoi këtë mision.
Ata theksuan se një veprim i tillë ishte i domosdoshëm për banorë të zonës dhe kërkuan rihapjen e pikëkalimeve doganore të Qafë Botës dhe Povllës, në mënyrë që situata t’i kthehet normalitetit dhe banorët të marrin shërbimin e nevojshëm.
Mbyllja COVID ka dëmtuar seriozisht këtë zonë, prandaj kërkohet vazhdimisht hapja e vendkalimeve të mësipërme.
Ekipi i mjekëve, i përbërë nga mjeku Dhimitris Gjikas me origjinë nga Livadhjaja, ortopedi Giannis Kostas nga Himara dhe mjekia reumatologe Ergeta Ktona, pedagoge në Universitetin e Mjekësisë në Tiranë, të emocionuar nga pritja e njerëzve, theksuan se do të vazhdojnë misionin e tyre dhe u bënë thirrje kolegëve të tjerë mjekë nga zona jonë që shërbejnë në spitalet e dy vendeve që të bashkohen në këtë përpjekje.
Kryetari i Bashkisë Kristaq Kiço dhe deputeti në pritje Niko Kuri, nga ana e tyre u zotuan të vazhdojnë përpjekjet për pajisjen me mjete e medikamente të qendrave shëndetësore dhe përmirësimin e shërbimit primar mjekësor në fshatrat e minoritetit. /sarandacity.al/
