Mursi: si u përkujtua “fajtorja pa faj” Katerina Çifteli, fjalët e një ish-kuadri kooperative

Në Qendrën Kulturore të fshatit Mursi u mbajt aktiviteti i organizuar nga Bashkia Konispol, në bashkëpunim me Autoritetin e Hapjes së Dosjeve Tiranë.

 “Mbasdite përkujtimore kushtuar Katerina Çifteli si viktimë e fundit e komunizmit”, ishte tema e këtij aktiviteti në të cilin ishin të pranishëm familjarë, banorë të fshatit Mursi dhe qytetit të Krujës.

Bashkia Konispol nderoi me Çertifikatë Mirënjohjeje Katerina Çiftelin pas vdekjes, si simbol i vuajtjeve dhe internimit pa arsye në diktaturën komuniste.

“Pas vendosjes të bustit të Rexho Plakut në Konispol, ky është aktiviteti i dytë që po bëjmë në Bashkinë e Konispolit, për ti kujtuar e për të mos e harruar asnjëherë të shkuarën tonë”, është shprehur Shuaip Beqiri, kryetar i Bashkisë së Konispolit.

Gjithashtu i pranishëm ishte Saba Sejdini që në vitin 1987 ka qenë ekonomist i kooperativës Cudhë, Krujë dhe e ka njohur personalisht këtë familje.

“Erdhën si një familje e internuar, por ikën si një familje me dinjitet dhe kulturë të lartë, që i gjithë fshati i kujton me nostalgji dhe dua t’iu sjell falenderimet që gjithë fshatarët e zonës tonë dhe të Bashkisë Krujë”, u shpreh Saba Sejdini.

Altin Hoxha dhe Simon Mirakaj, specialistë të Autoritetit për Informim mbi dokumentet e ish-Sigurimit të Shtetit dhanë kontributin e tyre në gjetjen dhe grumbullimin e informacioneve lidhur me dosjen e familjes Çifteli.

Në emër të familjes përshëndeti Marjeta Çifteli dhe nga banorët e fshatit foli Jorgo Gërbura dhe Kozma Gogo.

Qendra Kulturore shfaqi për të pranishmit dokumentarin “Fajtore pa faj”, me skenar e regji të Vangjel Tahos dhe realizim nga Balani Productions.

Katerina lindi në vitin 1960 dhe humbi jetën në 1989, ajo u internua në Cudhi Kamp të Krujës, por ende dhe sot nuk dihet arsyeja e internimit të saj. /sarandacity.al/