Kryebashkiaku i ri i Sarandës, Oltion Çaçi, ka përcjellë të parin mesazh publik pak orë pas marrjes së detyrës. Faleminderit të gjithë qytetarëve për besimin e dhënë, për ta çuar Sarandën përpara.
Njeriut të cilit i është besuar ky qytet delikat dhe gjithashtu i vështirë për katër vitet pasuese, e nis me definimin e vetes si “shërbëtor”
“Sot është një ndër ditët më të bukura të jetës sime që të kem privilegjin e madh të jem i zgjedhuri juaj në krye të Bashkisë së Sarandës. Jo thjesht qytetari i parë i Sarandës, por shërbëtori i parë i saj”, shprehet i riu Çaçi, edhe në moshë.
“Tani është momenti që të mos humbim kohë, të gjithë së bashku të nisim punën për projektet tona që do t’i paraprinë të ardhmes, transformimit dhe zhvillimit të Sarandës”, vijon ai, duke vizatuar atë që synon, atë që ka në mendje.
“T’i japim Sarandës statusin e një destinacioni turistik të niveleve europiane, dhe njëkohësisht pamjen e një qendre urbane moderne dhe sociale dinjitoze.
Zhvillimi i qëndrueshëm dhe mirëqënie për qytetarët tanë, janë prioriteti im! Të ndërtojmë një komunitet të përbashkët, ku secili banor të ndihet i rëndësishëm dhe i respektuar.
Do të punojmë pa u lodhur për të përmirësuar sa më parë infrastrukturën tonë dhe për të siguruar shërbime cilësore për të gjithë banorët e Sarandës.
Kemi nevojë urgjente për të mbrojtur dhe ruajtur mjedisin, duke u kujdesur për një qytet të pastër, me më shumë hapësira publike dhe tejkaluar sfidat e viteve paraardhëse për ti paraprirë një sezoni turistik që shënon nisjen e një epoke të re për Sarandën.
Të nisim punën për përmirësimin e shërbimeve publike, arsimin, kulturën dhe sportin, infrastrukturën shëndetësore dhe mundësitë e punësimit”.
Kryebashkiaku i ri premton një institucion të pabunkerizuar, jo në kuptimin fizik, teksa shptehet:
“Kjo është bashkia e gjithësecilit prej jush ku dera e këtij institucioni do të jetë gjithmonë e hapur”.
Çaçi synon t’i shohë si aksionerë të gjithë qytetarët e Sarandës, për qytetin e tyre, veten e tyre në qëllim fundor.
“Bashkëpunimi me njëri-tjetrin, bashkëpunimi me qeverinë dhe donatorët, tërheqja e projekteve të reja për Sarandën dhe përkushtimi ndaj punës do të jetë kryefjala e përpjekjes sonë për zhvillim.
Ndaj ftoj sot, gjithsecilin prej jush të bëjmë bashkë histori!
Të ndërtojmë një Sarandë më të fortë për fëmijët e së nesërmes që tejkalon veten dhe u pararend zhvillimeve dhe sfidave të së ardhmes. Na priftë e mbara!”, mbyll mesazhin e tij njeriu i pari i Sarandës, që nga e premtja pasdite. /sarandacity.al/
