Një hatërmbejtje e formuluar gabim: ç’ka ndodhur me piluriotët gjatë dhe pas “Bejkes së Bardhë”?

Pak ditë pas organizimit të eventit polifonik në Pilur “Netët e Bejkes së Bardhë”, organizatori Kristo Çipa ka shprehur një hatërmbetje, gjë e cila lexohet në fund të një statusi të tij ku rendit pjesëmarrjen e larmishme nga anekënd.

Festivali i dytë ““Netët e Bejkes së Bardhë”, një arritje dhe ç’na duhet më tepër”, e titullon Çipa shkrimin e tij, duke thënë më poshtë:

“Të nderuar miq!

Dhjetë ditë pas përfundimit të festivalit të dytë isopolifonik “Netët e Bejkes e Bardhë” ka patur në media dhe rrjetet sociale një jehonë shume të madhe e cila u bë shkas për të shkruar këto radhë.

Në formë informacioni e dhanë katër televizione kombëtare (Top Channel Raport.tv, Ora News dhe  News 24). Disa televizione lokale në Vlorë, Sarandë, Fier, Tepelenë, Gjirokastër.

Gjithashtu disa personalitete në fushën e mediave dhe specialistë kanë shprehur konsideratat e tyre nëpërmjet shkrimeve si Fatmir Terziu, Mero Baze, Anila Basha, Frrok Çupi, Timo Mërkuri, Bardhyl Maliqi, Kostandin Vogli, Luftar Paja, Fredi Mërkuri, Sejmen Gjokoli dhe së fundi akademiku Shaban Sinani.

Në këtë festival na nderuan me pjesëmarrjen e tyre disa personalite politike siç ishin deputetet Damian Gjiknuri, Vullnet Sina, Laert Duraj, Baftjar Zeqo, Bujar Leskaj. Katër kryetarë bashkie dhe kryetari i Këshillit të Qarkut Tiranë, Aldrin Dalipi.

Po ashtu edhe biri i fshatit Pilur, ish-deputeti Stefan Çipa. Nuk po i përmend edhe disa këngëtarë që nuk ishin pjesë e programit por kënaqësia dhe kurreshtja i solli në Pilur.

Pjesëmarrja e grupeve polifonike dhe mjaft këngdashësve i dha një atmosferë krejtesisht festive dhe shpresëdhënëse këtij evenimenti kulturor.

Nga kontaktet e bëra dhe sugjerimet e dhëna, na del detyrë që festivalin pasardhës ta ngremë në një nivel më të lartë si nga cilësia, pjesëmarrja, kohëzgjatja dhe shpërndarja në gjeografinë e Bashkisë Himarë”, shkruan ndër të tjera Kristo Çipa, për të mbërritur në fund, te pjesa e hidhur, që në fakt duket se është formuluar gabim, por që kuptohet mes rreshtash se ku është qejfmbetur.

“E vetmja gjë që lë për të dëshiruar ishte pjesëmarrja (duhet të kishte thënë mospjesëmarrja), e bashkëfshatarëve pilurjotë për nder dhe respekt të të cilëve organizohej ky aktivitet në vendlindje të tyre.

Nëse shoqëria dhe shteti ku jetojmë në vlerësojnë, së paku me prezencën tonë të tregojmë që jemi mirënjohës. Një fjalë e urtë e popullit thotë: ‘Trimëria pas betejës dhe mençuria pas kuvendit, nuk kanë vlerë’.

Gjthesesi ju falenderoj të gjitheve dhe pres vërejtje e sugjerime për edicionet e ardhshme”, përfundon statusin e tij Kristo Çipa, duke dhënë të kuptuar se diçka nuk ka shkuar mirë gjatë eventit e më pas. /sarandacity.al/