Një krizë ka shpërthyer mes Athinës dhe Londrës, pasi kryeministrit britanik Rishi Sunak anulloi një takim me homologun grek Kyriakos Mitsotakis. Shkak, një pasuri skulpturale nga bota antike greke e cila prej dekadash ndodhet në Londër.
Autoritetet greke i kanë kërkuar vazhdimisht Muzeut Britanik që të kthejë përgjithmonë skulpturat 2500-vjeçare të Partenonit që diplomati britanik Lord Elgin mori nga ai tempull në fillim të shekullit të 19-të, ndërsa ishte i dërguar në Perandorinë Osmane.
“Nuk jam aspak i kënaqur që kryeministri britanik anuloi takimin tonë vetëm disa orë para se të zhvillohej”, tha kryeministri grek Kyriakos Mitsotakis në një deklaratë për mediat.
Ai shpjegoi se pikëpamjet e Greqisë për skulpturat e Partenonit janë të njohura: “Shpresoja të kisha mundësinë t’i diskutoja ato me homologun tim britanik. Kushdo që beson në korrektësinë dhe drejtësinë e pikëpamjeve të tyre nuk ka kurrë frikë nga argumentet,” tha ai.
Qeveria greke ka folur me kreun e Muzeut Britanik, George Osborne, për një marrëveshje të mundshme për huazimin e skulpturave, të cilat kanë qenë prej kohësh një burim fërkimesh midis dy vendeve.
Në një intervistë me BBC të dielën, më 26 nëntor, Mitsotakis u ankua se bisedimet për një kthim të mundshëm të skulpturave në Athinë nuk po përparonin mjaftueshëm shpejt. Ai tha se mbajtja e përhershme e këtyre skulpturave në Muzeun Britanik është e barabartë me prerjen e Mona Lizës përgjysmë dhe se nuk është çështje pronësie, por ribashkimi.
Një zyrtar i qeverisë britanike, i cili foli në kushte anonimiteti, tha se grindja mbi skulpturat e mermerit nënkuptonte se ishte ende e papërshtatshme që takimi të zhvillohej.
Më herët, një zëdhënës i kryeministrit britanik Rishi Sunak tha se nuk kishte plane për t’i kthyer skulpturat.
Qeveria britanike nuk e ka konsideruar kurrë heqjen dorë nga pronësia e skulpturave, pasi pretendon se ato janë blerë në mënyrë të ligjshme.
Ligji nuk e lejon muzeun të heqë objektet nga koleksioni, përveç në rrethana të caktuara, por gjithashtu nuk e ndalon huadhënien, sipas disa mediave. /tesheshi.com/
