Vjelja e mandarinave në Xarë e Konispol këtë vit duket se do zë dhe janarin, siç të thonë në parcelat ku degët janë plot e ku vejnë e vijnë zetora që ngarkohen për t’u shkarkuar në pikat grumbulluese, disa të tilla përgjatë aksit nga Xara e deri në Konispol.
Euforia e kultivuesve ka shkuar deri aty sa këtë sezon të llogarisin që sasia totale e prodhimit të prek 50 mijë tonët. Mundet të jetë e ekzagjeruar kjo shifër, por fakt është se është viti me prodhimin më të madh, ç’prej kur ky pellg nisi të kultivojë mandarinën, këtu e 20 vjet më parë.
Kjo shihet dhe me sy të lirë, ku duket se sasi të caktuara do mbeten në degët e pemëve, pa mundur dot të vilen.
Sukses i këtij viti ka qenë dhe çmimi, i cili është mbajtur i optimalisht i lartë, pa iu dorëzuar lojrave të grumbulluesve të mëdhenj.
Ndërkohë, fronti i mandarinave është një tjetër i etur për punëtori, si përgjigje kokëforte për ata që thonë “s’ka punë” e zdarhallen rrugëve se mos iu bie puna(në fakt paraja) nga qielli. Dhe është punë me jo pak para, të paktën aq sa për të mos u ndjerë lypës. /sarandacity.al/
