Njeriu që çoi Kushnerin dhe Ivankën në Sazan: E bëra për vendin tim!

Në të gjitha komentet e deritanishme për investimin e dhëndërit të Trump-it në Sazan, kryeministri Rama ka shmangur të thotë emrin e njeriut që e çoi atje Jared Kushnerin dhe Ivankën, në ishullin e vetmuar dikur qytezë ushtarake.

Eshtë Auron Tare, ish-kreu i Agjensisë së Bregdetit në mandatin e parë të Ramës, ish-Drejtori i Butrintit në kohën e Nanos, njëherësh, njeriu nga i cili startoi projekti i “100 fshatrave” me Nivicën në Kurvelesh.

Tare sot jeton mes Amerikës dhe Shqipërisë, pa asnjë post zyrtar, por tejet aktiv në aspekte private të pasioneve të tij për trashëgiminë apo turizmin.

“Ata nuk e dinin fare ku binte Sazani për hir të së vërtetës”, tha ai në Opinion.

Fevziu: Ti i çove domethënë i pari?

Tare: Si urdhëron. Biles kam marrë disa telefonata nga njerëz që ishin shumë të revoltuar sepse mendonin se unë i kam çuar për një biznes privat dhe nuk e kuptoj që për të bërë diçka për të mirën e vendit tënd mund ta bësh edhe pa asnjë lloj interesi personal. Unë sot jam qytetar, jetoj në Amerikë nuk kam lidhje fare me këtë projekt. As Rama nuk më ka thirrur për të marrë mendje.

E kam bërë për vendin tim sepse kam kaluar një pjesë të mirë të kohës atje për të kuptuar çfarë mund të bënim.

Tare tha se pas Kushnerit është tjetërkush në këtë investim të mundshëm. “Duhet të dini diçka, nuk është vetëm Kushneri aty mbrapa. Aty janë disa njerëz shumë të rëndësishëm, më të rëndësishëm se Kushneri vetë”.

Fevziu: Të financave botërore?

Tare: Të financave botërore, të cilët janë pjesë e kësaj gjëje. Janë disa njerëz shumë të rëndësishëm. Nuk janë vetëm fondi i arabëve, janë edhe fonde të tjera. Janë edhe njerëz të tjerë të përfshirë me qeveri të tjera. Dhe nëse kjo ndodh do të jetë një gjë shumë e mirë për Shqipërinë dhe për turizmin e Vlorës.

Kujtojmë se Tare po bën një betejë të fortë anti-qeveri në lidhje me Butrintin, duke qenë kategorikisht kundër dhënies për administrim amerikanëve, por nga ana mbështet investimin në Sazan.

Rama-Tare, bashkëlagjarë që në fëmijëri, do ishin rivalë në basketboll, njëri me Dinamon e tjetri me Partizanin. Miq prej shumë vitesh, mes tyre ka një ftohje të dukshme, me shkak dhe Butrintin. /sarandacity.al/