KQZ ka vendosur të ndëshkojë me gjobë të gjitha ato KZAZ të cila kanë vonuar procesin e numërimit të votave, hera e parë që ndodh diçka e tillë.
Zëdhënësja e KQZ-së Drilona Hoxhaj, tha se janë gjobitur 18 KZAZ që kanë numëruar më pas se 50% të qendrave të votimit që kanë pasur në administrim.
Rezulton se në total janë 126 persona, kryesisht nga Tirana, por edhe nga rrethe të tjera të Shqipërisë.
“Lidhur me procesin e ecurisë së votave në 92 vendet e numërimit të votave, deri tani ka përfunduar numërimi për subjektet por edhe për kandidatët për 39 KZAZ, në 35 KZAZ kanë arritur të numërojnë vetëm mbi 50% të QV që kanë në administrim, ndërsa 18 KZAZ kanë numëruar më pak se 50%.
Duke patur parasysh ecurinë e ditës së sotme, më lejoni të ju informoj se KQZ ka vendosur sanksionin administrativ prej 3 mijë lekësh për të gjithë anëtarët e komisioneve të zonave të administrimit zgjedhor, të cilët deri në këto momente kanë numëruar më pak se 50% të QV, pra për 18 KZAZ.
Sanksioni është vendosur për mos respektim të nenit 122, pika 1 e Kodit Zgjedhor, i cili përcakton se tabela përmbledhëse e rezultatit të zgjedhjeve për zonën e administrimit zgjedhor nxirret nga KZAZ jo më vonë se ora 22:00″, tha ajo në një deklaratë për media.
Më herët, kreu i KQZ-së Ilirian Celibashi, tha se rezultati do jepej brenda 48 orësh. /sarandacity.al/
