Ofiqarja gjirokastrite që ka irrituar OMONIA-an

OMONIA ka reaguar pas deklaratave të zv/ministres së Turizmit, gjirokastrites tjetër në krye të këtij dikasteri, Ornela Çuçi, e cila në një intervistë televizive tha dje se “duhet të bojkotohen shërbimet që nuk ofrohen në gjuhën shqipe në jug të vendit”.

Sipas organizatës së njohur të Minoritetit, ky është racizëm linguistik dhe me këtë, znj. Çuçi është treguar antihelenike.

“Racizmin linguistik dhe në rastin konkret, antihelenizmin e znj. Zv. Ministre, e dënojmë pa asnjë ekuivok. I sjellim në vëmendje se të drejtën e përdorimit të Gjuhës amtare Greke, e kemi sanksionuar në rrugëtimin e historisë dhe për më tepër e kemi garantuar nga konventa dhe praktika të Europës, në të cilën Shqipëria synon të integrohet,” thuhet në deklaratën e OMONIA-s.

“Demaskuese përsa i përket mentalitetit që mbizotëron në administratën e lartë të shtetit, është deklarata e Zv/ministres së Turizmit dhe Mjedisit të Qeverisë Rama, znj. Ornela Çuçi. Pyetjes provokative dhe kryesisht të paragjykuar të gazetarit, në kuadrin e intervistës së saj, dje, në stacionin “ORA tv”, mbi atë se çfarë duhet të bëjë vizitori në Jug të Shqipërisë (nënkupton trevat e Gjirokastrës, Sarandës, Himarës, ku historikisht dhe në numra të konsiderueshëm rron Minoriteti Etnik Grek), ku rastis t’u drejtohen në greqisht për porosinë, znj. Zv. ministre, shkoi shumë më larg: Të bojkotojnë shërbimet që nuk u ofrohen në Gjuhën Shqipe!”, thuhet në fillim të reagimit. Sipas OMONIA-s, “nga një politikane e re relativisht, me origjinë nga Gjirokastra ku është ambientuar me karakterin bilingue të zonës, dhe kryesisht një person që ka punuar në zonat e kontaktit mes Shqipërisë dhe Greqisë, pritej që t’i jepej një mësim civilizues gazetarit të paragjykuar dhe opinionit me atë rast. Ajo preferoi ta shkojë më larg në drejtimin krejt të kundërt të atij të dëshiruar”.

Reagimi minoritar përfundon: “Logjika dhe arsyetime sikundër këto që na solli në vëmendje ofiqarja e administratës së lartë të shtetit nuk e ndihmojnë as integrimin, as emancipimin e shoqërisë dhe për pasojë prosperitetin e ekonomisë dhe mirëqenien e shoqërisë”. /sarandacity.al/