Pas Policisë së Shtetit dhe SHÇBA, ka ardhur dhe reagimi i Ministrit të Brendshëm, Blendi Çuçi për incidentin në Qafë Mollë, ku një efektiv policie ushtroi dhune ndaj operatorit të A2 CNN, Endrit Aga dhe gazetares së TCH Anila Hoxha, të cilët po raportonin nga vendngjarja, duke vënë në rrezik jetën e tyre.
Ministri Çuçi shkruan se efektivi që ushtroi dhunë ndaj gazetarëve do të ndiqet penalisht, ndërsa premtoi zero tolerancë ndaj shfaqjeve të tilla.
“Lidhur me incidentin e ndodhur një ditë më parë me gazetaren Anila Hoxha, dua t’ju informoj se efektivi i policisë është larguar nga detyra. Drejtori i Policisë së Shtetit dhe drejtori i SHÇBA kanë komunikuar menjëherë me gazetaren, si dhe në bazë të kallëzimit të saj efektivi do të ndiqet penalisht.
I kërkoj ndjesë dhe e falënderoj znj. Hoxha, si dhe iu bëj thirrje gjithë qytetarëve që ndeshen me efektivë të tillë policie të mos heshtin, por t’i denoncojnë. I garantoj se toleranca për këto shfaqje të shëmtuara si ajo e një dite më parë do të jetë zero.
\Gjej gjithashtu rastin t’u bëj thirrje efektivëve të Policisë së Shtetit të mos ia lejojnë vetes të bien në këtë nivel, që i përjashton ata automatikisht nga radhët e uniformave blu”, shkruan Çuçi. /tesheshi.com/
