Shqipëria është tashmë me një president të ri: quhet Bajram Begaj, një Gjeneral, koka e Ushtrisë Shqiptare, njëherësh dhe mjek, i cili do jetë kreu i ri i shtetit, duke pasuar Ilir Metën, njeriun që do mbetet në kujtesë si presidenti më i diskutueshëm në historinë e paskomunizmit, për shkak të të bërit qartazi politikë, tipike të LSI-së, me mandat pesidenti.
Bajram Begaj u votua qartazi nga mazhoranca me 78 vota pro, por sigurisht pa votat e opozitës së përçarë.
Gjithsesi, për të votuan, jo domosdoshmërisht pro, disa emra opozitarë, si Mesila Doda, Shpëtim Idrizi, Monika Kryemadhi, Petrit Vasili dhe Erisa Xhixho, ndërsa pjesa më e madhe bojkotoi.
Pas votimit, kreu i mazhorancës që e propozoi, Edi Rama, tha se Shqipërisë tashmë i është dhënë një “president normal”.
“Besoj se kemi arritur objektivin që kemi pasur që në krye të herës dhe të gjitha reagimet flasin për këtë, natyrisht përjashtuar ndonjë reagim pa lidhje të hapësirës politike, flas përtej saj, që do të thotë që i kemi dhënë Shqipërisë një president normal, një figurë të pakontestueshme në aspektin e integritetit të humanizmit dhe patjetër edhe të përkushtimit për vendin dhe njerëzit.
Nuk ka asnjë rëndësi se cili ka qenë përfundimi aritmetik, rëndësi ka që ky proces është kurorëzuar me një provë të prekshme për të gjithë që PS është këtu për të bërë më të mirën që zgjedhjet, vendimet, aktiviteti ynë si shumicë qeverisëse të shkojnë në interes të vendit dhe të të gjithë shqiptarëve, jo thjesht të njërës palë.
Lumturia është një fjalë shumë e madhe, por ajo që mund të them me plot gojën është që një proces aspak të lehtë, me një sallatë palësh nga ana tjetër të gjysmë sferës së parlamentit, kemi arritur t’i japim jetë një procesi në të cilin kanë pasur të gjithë mundësi të kontribuojnë dhe ka dalë një figurë e paidentifikueshme thjesht me ne që e kemi propozuar por e identifikueshme me qytetarin shqiptar, dinjitoz dhe të respektueshëm, me njeriun besnik ndaj vendit dhe detyrës, me shembullin e një burri të qetë, të arsyeshëm, normal”, arsyetoi kryeministri. /tesheshi.com/
