Ka ardhur një reagim nga qeveria lidhur me rrjedhjen e nje database pagash, ku është zëdhënësi Endri Fuga që jep shpjegime.
“Ministria e Financave dhe Ekonomisë ka ndjekur me shqetësim daljen e të dhënave mbi pagat e shtetasve shqiptarë. Analizat paraprake tregojnë qartësisht se nuk ka ndodhur asnjë eksport dixhital i databazës së pagave për periudhën janar – prill 2021 në fushat e dokumentit të hedhur në qarkullim”, shprehet Fuga.
Sipas tij, “dokumenti ka një numër të ndryshëm nga personat e deklaruar dhe është bashkim i disa copave të ndryshme”.
Më tej, ai sqaron “databaza digjitale zyrtare e të dhënave të disponueshme nuk e përmban fushën ‘Emri i Plotë’ siç lexohet në këtë dokument ilegal”.
Fuga shkruan po ashtu se do ketë dhe nga qeveria një denoncim për rastin.
“Agjencia Kombëtare e Shoqërisë së Informacionit ka mbyllur prej rreth një muaji termat e referencës për procedurën e hapur ndërkombëtare të auditimit për efekt të çertifikimit me standartet ISO të sistemit informatik të tatimeve, e cila shpallet zyrtarisht javët e ardhshme.
Ndërkohë ministria e Financave dhe Ekonomisë po përgatit denoncimin zyrtar për prokurorinë, në kërkim të zbardhjes së kësaj ndërhyrjeje kriminale në databazën e pagave të qytetarëve të Republikës së Shqipërisë”. /tesheshi.com/
