Mbrëmë në shëtitore u çel Panairi Artizanal që do të zgjasë tre net.
Ishte kryebashkiaku Gurma ai që preu shiritin në ceremoninë e hapjes, duke vizituar më pas të gjithë bangot e artizanëve, të cilët kishin prezantuar punët e tyre. Por nuk mungonin dhe përshpërima pakënaqësie mes tyre me pretendimin se kishte dhe produkte kineze. Por sipas organizatorëve, kjo nuk është e mundur pasi produktet janë parë imtësisht për të penguar çdo prani të tillë.
Ndërkohë, nga artizanë të Sarandës të cilët për herë të parë këtë vit nuk kanë qenë në shëtitore, pasi Bashkia i ka zhvendosur në një ambient të veçuar prej saj, këto tre net janë parë si shans për të bërë “ndonjë lek” këtë sezon, të cilin, mu për këtë arsye, heqjen nga shëtitorja, e vuajnë si ndëshkim të padrejtë ndaj tyre.
Dhe për ironi, i vetmi artizan që punonte me dorë produkte gjatë prezantimit, ishte pikërisht nga ata të Sarandës pa prani në shëtitore. /sarandacity.al/
