Parajsat nënujore të Jonit: duke eksploruar “Gjirin e Djallit” e “Grykën e Xhehenemit”

Zgjerimi i Zonave të Mbrojtura në Shqipëri synon të rrisë integritetin e këtyre zonave, për gjendjen e paprekur të tyre, krahasuar me zona të tjera të vendit, për biodiversitetin e lartë, për habitatet e rralla që bartin.

Ministria e Turizmit dhe Mjedisit me mbështetjen financiare të qeverisë italiane dhe Organizatës së Kombeve të Bashkuara po punojnë për të mbrojtur dhe zgjeruar Zonat e Mbrojtura të Shqipërisë.

UNDP Albania publikoi një video nga “Gjiri i Djallit” në Parkun Detar Karaburun Sazan, që është shpallur Zonë e Mbrojtur, e cila ofron pamje spektakolare të botës nënujore në këtë park detar, teksa thekson se “kjo është një nga mënyrat se si ne e ndihmojmë Shqipërinë të arrijë Objektivin e Zhvillimit të Qëndrueshëm 14 – Jeta nën ujë”.

Sazani është një ishull i vogël prej rreth gjashtë kilometrash katrorë, që ndodhet përballë Gjirit të Vlorës, në Kanalin e Otrantos. Një shkëmb gjigant që prej dekadash ka qenë një bazë ushtarake e paarritshme, dhe që sot po shndërrohet në një prej atraksioneve turistike kryesore të Shqipërisë.

Nga këtu, mund të shkohet në këmbë në bregun perëndimor, ku ndodhet “Gryka e Xhehenemit” dhe “Gjiri i Djallit”, që përbëjnë një peizazh spektakolar.

Nga viti 2010, ishulli bën pjesë, bashkë me gadishullin e Karaburunit, në Parkun Kombëtar Karaburun-Sazan, që mund të arrihet nëpërmjet një prej shumë anijeve që nisen nga porti i Vlorës.

Këtu mund të admirohet shpella e mrekullueshme e Haxhi Aliut, e konsideruar si më e madhja dhe më e thella në gjithë Shqipërinë, që të dhuron një spektakël unik dhe emocionues. /ATSH/

https://youtu.be/SU58BAe8sRI