Ambasadorja Yuri Kim iu është bashkuar ish-të përndjekurve politikë dhe të afërmve të tyre në hapjen e një ekspozite të jashtme të përhershme në ish-kampin e internimit në Tepelenë.
Gruaja që përfaqëson SHBA në Shqipëri shkruan se u prek nga historia e një prej të internuarve e se autoritetet duhet të angazhohen me këtë pjesë të dhimbshme të historisë së Shqipërisë.
“Isha e nderuar t’iu bashkohesha ish-të përndjekurve politikë dhe të afërmve të tyre për inaugurimin e ekspozitës së jashtme të përhershme në ish-kampin e internimit në Tepelenë.
Gjatë funksionimit të tij në vitet 1949-1953, kampi i Tepelenës mbajti mbi 3000 njerëz, në kushte të tmerrshme. Vetëm gjatë dy muajve në vitin 1950, vdiqën nga sëmundjet 285 fëmijë.
U preka kur dëgjova Simon Mirakajn, i cili u detyrua të jetonte atje nga mosha katër deri në 9 vjeç, të fliste për atë që ai dhe të tjerët duruan në kamp.
Është shumë e rëndësishme që autoritetet shqiptare të vazhdojnë të mbledhin dhe të publikojnë dokumente dhe të dhëna në lidhje me këtë pjesë të dhimbshme të historisë së Shqipërisë.
Njerëzit vazhdojnë të vuajnë, veçanërisht ata që nuk kanë gjetur ende eshtrat e të dashurve të tyre.
Paqja nuk mund të vijë pa të vërtetën dhe pajtimin”, shkruan Yuri Kim, për një tematikë në fakt që prej kohësh nuk është çështje debati në Shqipëri. /sarandacity.al/
