“Për kafe në Korfuz”: zhdukja e polakut 74-vjeçar i nisur me not nga Ksamili

Detaje të reja janë zbuluar nga ngjarja e ndodhur një ditë më parë në Sarandë, ku një shtetas polak u denoncua i zhdukur.

Sipas burimeve, i moshuari Zbibnië Kaczorowski, 74 vjeç, kishte veshur një palë këmbëza noti dhe rreth orës 10:30 të paradites së të hënës u hodh në det në Ksamil duke u shprehur: “Do shkoj për një kafe në Korfuz”.

Ai u zhduk që prej orës 10:30 të paradites të së hënës, ndërsa denoncimi për të në polici u bë në orën 20:00 kur u konstatua se i moshuari nuk po kthehej.

Pas disa orësh kërkimi nga toka dhe nga ajri me dron, polaku 74-vjeçar Zbibnië Kaczorowski, u gjet i vetmuar në plazhin përballë ishullit Tongo, që për koiçidencë u promovuar nga Rama pak ditë më parë.

Ai u gjet i ulur në rërë dhe i rraskapitur, pasi mesa duket “piloti i detit” kishte ngatërruar rrugë, duke kryer rreth 7.5 milje detare me not e duke ngelur sërish në tokën shqiptare, pra pak milje më shumë se distanca detare Ksamil-Korfuz.

Falë ndihmës që iu dha nga forcat policore të Sarandës ai sot është në jetë.