Ksamili ynë, ose plazhe të tjera të Bregut, perla të vërteta natyrore, të cilat edhe promovohen rregulisht në revista turistike europiane, nuk kanë mundur të renditen së paku në 5 më të pëlqyerat në Instagram.
Portali britanik money.co.uk analizoi mbi 26 milion hashtag në Instagram në lidhje me plazhet në të gjithë botën. Të dhënat u mblodhën në prill të këtij viti për të marrë rezultatet më të fundit. Kjo është një listë e 5 plazheve më të mira të zgjedhura nga përdoruesit e rrjeteve sociale.
Plazhi Tropea, Itali
Tropea është një vendpushim klasik italian plot sharm dhe ndodhet në Detin Tirren. Ky plazh quhet ndryshe “Costa degli Dei”, ose “Bregu i perëndive”, gjë që e bën atë një destinacion të preferuar për turistët dhe vendasit. Ndërsa kënaqeni me hijeshitë e plazhit dhe diellit, ju jeni të rrethuar nga shkëmbinjtë dramatikë me pamje nga qendra historike e qytetit me peisazhin e saj epik.
Plazhi Navajo, Greqi
Kjo pjesë mahnitëse e bregdetit të vogël njihet gjithashtu si “plazhi i anijes”, pasi falë mbytjes së një anijeje dhe promovimit të mirë, është bërë një nga plazhet më të famshëm në botë. Rëra e bardhë, rrënoja e vjetër dhe shkëmbinjtë krenarë që rrethojnë plazhin, ofrojnë një pamje të mbresëlënëse.
Praia do Camilo, Portugali
Praia do Camilo është ndoshta një nga plazhet më të famshëm në Portugali. Rëra e artë, ujërat kristal e të kaltër janë mundësia e duhur për të gjithë turistët që pëlqejnë diçka ndryshe. Praia do Camilo është një parajsë gjatë gjithë vitit dhe është një përvojë e veçantë të qëndrosh në të gjatë dimrit. Deti është mjaft i cekët, jashtëzakonisht i pastër dhe uji nuk është i ftohtë.
Cala Saona, Spanjë
Cala Saona është një plazh që u ofron turistëve mundësinë të kalojnë tërë ditën duke bërë banja dielli dhe duke notuar deri në orën 21:00 kur dielli fillon të perëndojë. Këtu janë perëndimet më të mira të diellit në botë, të paktën kështu thonë ata që e e kanë shijuar.
Margate Beach, Angli
Nëse do të duhej të përshkruani një vendpushim tradicional britanik, Margate Beach është pikërisht ai. Ky plazh është pothuajse i përjetshëm, të gjitha brezat gjejnë strehë në të, dhe veçanërisht tërheqës janë tezgat e prodhimeve të detit, restorante dhe bare të shumta të vendosura në bregdet. /sarandacity.al/
