Plehrat: si i përgjigjet “gjumashi” i Himarës xanxës së Edi Ramës

Kryebashkiaku i Himarës Jorgo Goro, duket se e ka përjetuar keq xanxën në publik si “simboli i të fjeturit gjumë” përballë plehrave. Ndaj, ai ka dërguar ekipin për të pastruar rrugën nacionale Himarë-Sarandë, duke shkruar:

“Nëse njihni dikë që ka ndërruar këto ditë mobiljet e shtëpisë. Apo që ka pirë një kuti me birra… Ju lutem na ndihmoni me kontaktin që ta gjejmë! Kjo sepse i ka lënë në mes të vendit dhe punonjësit e Bashkia Himarë mund t’jua sjellin sërish tek shtëpia. Për herës tjetër gjithmonë, pasi me aksionet intensive të këtyre ditëve, i kemi depozituar aty ku duhet”, shkruan i pari i Bashkisë së madhe të Bregut.

Ai vijon më tej, me nëntekste si mesazh për Ramën, që ashtu siç e do i pari i qeverisë, xixë kudo, është gati e pamundur.

“Rastet e hedhjes së mbeturinave pa kriter në Bashkinë Himarë, më saktë në një Bashki ndoshta për ‘guiness’ për sa i përket gjatësisë bregdetare, relievit, shpërndarjes dhe mundësive të pakta si një Bashki jo ‘e madhe’, janë shumta. Nga inertet deri tek sendet e shtëpive, njerëz të ndryshëm, subjekte tregtare deri tek kalimtarët apo turistët sezonal, janë problematika që nuk marrin zgjidhje vetëm me aksione.

Duhet ndërgjegjësim, duhet bashkëpunim. E përsëris, dhe më duhet ta ripërsëris: Himara fillon në Qafën e Llogarasë dhe përfundon në hyrje të Sarandës. Fillon në Bashkinë Selenicë dhe përfundon kufi me Bashkinë Tepelenë në Lumin e Vlorës. Mundohuni të na ndihmoni se paku duke na mirëkuptuar që Himara nuk eshtë vetëm Dhërmiu apo Palasa… ”, shkruan Goro në rrjete sociale. /sarandacity.al/