Kryebashkiakja e Delvinës, Majlinda Qilimi, ka sjellsë fundi në vëmendje simbolin trashëgimor të Delvinës, Xhaminë e Gjin Aleksit në Rusan, rikonstruktuar vitet e fundit e shndërruar kësisoj në një monument plot shkëlqim.
“Xhamia e Gjin Aleksit, Monument Kulture i Kategorisë së Parë, është një prej objekteve me vlerë që i përket trashëgimisë sonë kulturore.
Mendohet se është ndërtuar midis fundit të shek.XVI dhe fillimit të shek.XVII mbi rrënojat e një manastiri me stil bizantin.
Xhamia përbëhet nga portiku, salla e lutjeve dhe minareja. Kjo xhami ka qënë e famshme për akustikën e saj të veçantë.
Si një nga objektet që përmban gërshetim kulturash nga ajo vendase, në atë postbizantine, e deri otomane, xhamia ka tërhequr dhe vijon të tërheqë vëmendjen e vizitorëve të shumtë”, shkruan gruaja që qeverisë Delvinën.
Gjithsesi, ajo çfarë ha diskutim fjalia e fundit: “xhamia ka tërhequr dhe vijon të tërheqë vëmendjen e vizitorëve të shumtë”.
Është një fjali e përgjithshme, pasi për këtë vizitueshmëri nuk ka statistikë, e duke qenë kështu mungon krahasimorja e kësaj vizitueshmërie.
“Gjin Aleksi” do ishte vërtet një prej “forcave tërheqëse” drejt Delvinës nëse do kishte një metodikë apo projekt të detajuar e praktikuar promovimi e menaxhimi.
Ngjan si me rastin e Butrintit deri nga fundi i viteve ’90, ku vetëm dihej se ekziston një sit arkelogjik unik, por pa strategji promovuese e menaxhuese.
Sot për Butrintin jepen shifra, të cilat janë gjithnjë në rritje dhe që është shndërruar gati shenja kryesore e Sarandës për turizmin. /sarandacity.al/
