Në një protestë të zhvilluar para Ministrisë së Brendshme, thirrur nga shoqëria civile dhe opozita pas rastit tragjik të Himarës, foli dhe një e afërme e 7-vjeçares së ndjerë që humbi jetën nga gomonia e drejtuar papërgjegjshmërisht nga një efektiv policor.
Edhe ajo tha se rastin e bën të rëndë pikërisht ky fakt, autorësia e një personi që përfaqësonte ligjin dhe shtetin.
“Nuk është e thjeshtë për mua të flas. Ajo që ka ndodhur në familjen tonë është shumë e rëndë. Nuk kam komente për atë çfarë ndjen Bledi dhe Ermira. Dhimbja e tyre peshon aq rëndë sa nuk mund t’ua shpjegoj dot. Nuk mund t’ua shpjegoj se si është Bledi sot, gjyshe Nazmia, gjysh Ismeti, hallat që kanë parë skenën. Unë dua që të mos bëjnë politikë për këtë çështje.
Bledi e ka pasur kapur prej dore vajzën. Kanë qenë duke notuar në breg të detit së bashku. Skafi ka ardhur e ka goditur njëherë, më pas e ka xhiruar dhe trupin e vajzës e ka grirë përmes helikave.
Kam vetëm trishtim për atë që i ka ndodhur djalit të dajës tim. Sot kamë dalë për Jonadën, për Dean. Kam dalë që ajo që i ka ndodhur Jonadës të mos i ndodh askujt në botë.
Ne gjatë ditës kemi parë raste kur skafet kanë përplasur njerëz dhe nuk janë marrë masa, por kur ndodh nga oficerë të policisë situata është më e dhimbshme.
Dhimbja na ka kapluar por nuk na ka rrëzuar. Ermira dhe Bledi kanë kaluar shumë peripeci dhe sërish janë duke kaluar peripeci. Ka ikur 17 vjeç nga Shqipëria, me punë dhe dashuri ka krijuar një familje model dhe atdhedashuria e bënte të kthehej në Shqipër”, familjarja e Abdiajve, familjes nga Tropoja e cila po përjeton momente të kobshme pas ikjes nga kjo botë të vajzës së tyre në mënyrë tragjike. /tesheshi.com/
