Në një shkrim dossier kushtuar atyre që regjimi komunist i quante “Provokacionet e Gushtit”, pra futjen e ushtrisë greke në territorin shqiptar me pasojë qindra të vrarë, vihet në dukje dhe një rast i ngjashëm por pa viktima kësaj anë të kufirit.
Theksojmë se ngjarjet e 72 viteve më parë do të zhvilloheshin në kufirin julindor të vendit.
“Pikërisht më 2 gusht të vitit 1949, disa reparte të ushtrisë qeveritare greke, të mbështetura nga artileria dhe aviacioni luftarak, sulmuan në disa pika të kufijve juglindorë të të Shqipërisë në rrethet e Korçës dhe Kolonjës. Si rezultat, forcat qeveritare të ushtrisë greke, të cilat Tirana zyrtare i etiketonte si monarko-fashiste, mundën të hynin disa herë me qindra metra në thellësi të tokës shqiptare, si në fshatin Bozhigrad, sektorin Vidohovë etj., ku u ndeshën me rezistencën e rojeve shqiptare të kufirit dhe forcave të Divizionit të Mbrojtjes së Popullit që ishte instaluar prej kohësh në rrethin e Korçës”.
Thuhet kjo në një dossier me autor gazetarin e arkivave Dashnor Kaloçi.
Pikërisht aty, veçohet rasti i një avioni grek të rënë në Finiq.
“Komunikatë Operative e Ministrisë së Forcave t’Armatosura të Republikës Popullore të Shqipërisë.
Në ora 7.55 datë 4.VIII.1949, një aeroplan i banditëve monarko-fashistë fluturoi mbi tokën tonë mbi katundet Hoxhaj(Livadhja) dhe Markat. Aeroplani i qëlluar nga forcat tona ra në fushën e Finiqit afër Sarandës. Piloti u kap i gjallë.
Në orën 14.00 datë 5.VIII-1949 në afërsi të piramidës Nr. 15 u dorëzuan 5 ushtarë monarko-fashistë”.
Kujtojmë se këto incidente ishin të karakterit ideologjik dhe jo entik.
Në Greqi kishte një luftë tipike civile mes monarkistëve dhe komunistëve, ku këta të fundit përkraheshin nga qeveria komuniste e Tiranës.
Shumë prej eksponentëve komunistë grekë në atë kohë strehoheshin në Tiranë. /sarandacity.al/
