PS përgjodhi tre emra negociatorësh me opozitën, që do jenë në fokus një emër të ri post-Meta në krye të shtetit shqiptar. Kjo u bë me dije nga Taulant Balla pas mbledhjes së grupit socialist.
Më 24 korrik Meta duhet të dalë nga Presidenca, ndaj për mazhorancën duhet të nisë procesi për emrin që duhet ta pasojë.
“Po afron dita që në konferencën e kryetarëve të ketë një kalendar për zgjedhjen e Presidentit të Republikës, jo më vonë se 60 ditë nga dita e përfundimit të mandatit, pra jo më vonë se 24 maji duhet të ketë filluar procesi. Kuvendi do të marrë kohën e duhur për të zhvilluar një proces.
PS ka udhëheqësinë e këtij procesi si shumicë parlamentare, dëshira është për një proces të hapur konsultimesh, natyrshëm brenda suazës së Kuvendit, dhe bashkë me mua si kryetar i grupit parlamentar do jetë edhe Spiropali dhe Gjiknuri si të mandatuar nga grupi për të konsultuar me grupet e tjera parlamentare, me deputetë me këdo që është i interesuar për të institucionalizuar një dialog konstruktiv”.
Për zytarin socialist, negociimet politike me opozitën nuk kushtëzohen fare nga zhvillimet brenda saj.
“Grupet parlamentare janë ato që ju dini, çfarë ndodh në grupet parlamentare është çështje e tyre. PS gjithmonë ka qenë e vetmja parti që ka kontribuar në vendosjen e standardeve”, argumentoi Balla.
Siç tha ai, qëllimi është që njeriu post-Meta do mos jetë si Meta.
“Shqipëria sot më shumë se kurrë ka nevojë për një president normal, dhe natyrshëm duke qenë se nuk kemi pasur një president mbi palët por palë e palëve të opozitës. Ne na duhet që Shqipëria në vitin 2022 të zgjedhë një president në aspektin diametralisht të kundërt me atë që ka përfaqësuar Ilir Meta. Shqipëria do të ketë një president ose presidente shumë më të mirë dhe të pakrahasueshëm me Metën”, tha Balla. /sarandacity.al/
