Siç ishte parathënë, Çekia hapi të parën konsullatë në Jug, pikërisht në Sarandë, duke e reflektuar kështu me vepër konkrete afeksionin e autoriteteve të Pragës për perlën e turizmit të Jonit.
Shiriti i inagurimit u pre pikërisht këtë të premte.
Ambasadori Jaroslav Ludva tha se kjo “është një ditë e veçantë për Çekinë dhe Sarandën, si një ogur i mirë për shtimin e shkëmbimit të kulturave mes dy shteteve dhe se kjo është një mundësi që bizneset të përfitojnë shërbime të lehtësuara dhe asistencë dhe që njerëzit e kulturat tona t’i sjellim më afër, raporton Bashkia”.
Kjo e fundit citon kryebashkiakun Adrian Gurma, i cili e quajti një privilegj që Saranda të bëhet vendi i të parës konsullatë çeke në Shqipëri që do të ofrojë shërbime konsullore për qarkun e Vlorës dhe Gjirokastrës.
“Ngjarje historike në marrëdhëniet 99-vjeçare me Shqipërisë dhe Çekisë, e ka quajtur Lolita Jorkevitz hapjen e Konsullatës së Nderit në Sarandë”, thuhet më tej nga Bashkia.
Kujtojmë se kjo konsullatë në Sarandë vjen dekada pas asaj italiane, greke e rumune që ka ekzistuar dikur.
Çekia është një vend i Europës Qendrore, që vitet e fundit ka një shtim të raporteve shqiptare me të, në shumë fusha. /sarandacity.al/
