Rama: Edhe Ismail Qemali quhej hajdut!

Kryeministri Rama pohoi se dhe “edhe Ismail Qemali është konsideruar hajdut”.

U tha kjo prej tij në kontekst të atmosferës së Pavarësisë, por me temë investimin emiratas në Durrës, të cilën e mbrojti stoikisht në parlament, duke iu përgjigjur akuzave të opozitës për aferë me atë çfarë kanë thënë e shkruar Konica, Noli apo Lumo Skëndo. Sipas tij, kur këta korifej të mendimin kritik shqiptar analizonin të metat apo mbrapshtitë shqiptare, kishin parasysh pikërisht atë që sot është opozita në gjuhën apo mendësinë e saj.

“Këta ishin, këta janë të njëjtë, është shkencërisht e provueshme, janë të njëjtë që mu si pykë i rrinë Shqipërisë që nga 1912, në çdo Shqipëri të re”, tha Rama.

Ai mbrojti investimin emiratas, duke thënë se  “do të jetë një motor ekonomik me një kontribut 8 miliardë euro në PBB, ndërkohë që do të ngrejë peshë vlerën e Durrësit dhe gjithë Shqipërisë, vlerën e gjithë hoteleve në bregdetin e Durrësit”.

“Është garantuar imuniteti i pronës publike nga çdo lloj mundësie hipotetike cenimi. Kontrata parashikon se në rast mosbzatimi nga investitori, shkohet deri në marrjen e gjithçkaje që ai ka bërë deri atëherë. Këto janë vetëm disa nga detajet e panumërta të një kontrate për të cilën jemi krenarë që ia sjellim këtij Kuvendi” deklaroi Rama.

Ai tha se është e papranueshme të përflitet një biznesmen si Muhamed Alabaar.

“Po akuzojnë edhe themeluesin e një kompanie globale i cili është në drejtën e tij të vij dhe të ndërtojë një kompani Eagle Hill Albania…

 Muhamed Alabaari, që Allahu e tij e di se çfarë i duhet në gojën e ndyrë të vagabondëve të 1914. Ngrini kauza për një personalitet të një kompanie globale, ai duhet pritur me lule këtu, se do hapë rrugë për investimin e këtij vendi. 12 mijë vende pune”, tha Rama.

Ai dha garanci dhe për Portin e ri të Durrësit që do të ndërtohet në Porto Romano, aty ku do jetë dhe Porti i Thatë për Kosovën.

“Porti i Thatë është një projekt nga mjeshtrit e njërës prej kompanive me prestigjioze ndërkombëtare. Kemi hapur një dritare ku mund të shihet një ardhme e ndritur për Shqipërinë dhe Kosovën por edhe një kanal bashkëpunimi me NATO-n që ka shprehur interes”.

Sipas tij, Porti i Mallrave në Durrës nuk mund të jetë më aty ku është. “Të jemi të qartë se për çfarë do flasim sot. Flasim për një port si në Mesjetë ku tregtohet krom në zemër të qytetit, lulëzojnë sipërfaqe me ndryshk dhe kalben mjete lundruese të vjetra”. /sarandacity.al/