Kryeministri Rama është shfaqur aty ku ai shpreson, por dhe beson deri diku, se mund të ndrisë ylli i fatit për Shqipërinë në kontekst ekonomik: në Shpirag.
Aty, i pari i qeversjes lutet për një “fat arab”, apo dhe nordik, kur është fjala për Norvegjinë, pasi ka dështuar të jetë japonez në qeverisje, ku zgjidhja për një shoqëri me standarte gjendet te njeriu, arsimimi dhe kreativiteti i tij e jo te toka ku jeton.
“Sot në Shpirag, ku zbulimi i rëndësishëm i kryer 6.1km në thellësi të tokës naftëmbajtëse, mbart bashkë me premtimin e madh të nxjerrjes së një pasurie të konsiderueshme për Shqipërinë dhe shqiptarët, edhe sfidën e testit përfundimtar teknik të vlerësimit të qëndrueshmërisë së presionit të fluksit të gazit e të naftës, deri mbi sipërfaqen e tokës.
Në fund të këtij viti do ta mësojmë edhe këtë, ndërkohë që po punojmë paralelisht për projektin e Fondit Sovran që do të administrojë në rast suksesi të testit final një pasuri kaq të madhe kombëtare, duke u nisur nga studimi i vëmendshëm i praktikave botërore të fushës, si fondet sovrane të Norvegjisë, Arabisë Saudite, Azerbajxhanit e me radhë.
Paçim fat tanimë kur kjo përpjekje thuajse dhjetëvjeçare, po i afrohet orës vendimtare të së vërtetës”, shkruan Rama. /sarandacity.al/
