Kryeministri Rama nisi fushatën e cytjes së biznesit për t’u rritur pagat punëtorëve, pak ditë pas shfaqi një shqetësim publik për krahun e punës.
Ai u ndal veçanërisht te sektori i turizmit, që tashmë ka uri për punëtorë por nuk gjen dot.
“Sipërmarrësi shqiptar duhet ta kuptojë që nuk mund t’i japi gruas që pastron atje në Himarë e në Dhërmi 300 mijë lekë sepse është nga vendi edhe pastaj marrin nga Bali edhe nga Filipinet dhe ju japin nga 1000 euro. Nuk mund të funksionojë kështu. Duhet që punonjësin shqiptar ta vlerësojmë si sytë e ballit. Ta ndihmojmë me çdo çmim sepse është ai që e bën.
Hiqini ato gratë që janë atje nëpër ato kaunterat aty dhe që hapin e mbyllin derën e dyqaneve dhe të zotit të kësaj nuk i funksionon më biznesi dhe i rrofshin miliardat”, tha Rama në një takim me biznesin e madh, duke shtuar se pronarët ja bëjnë vetes me mënyrën e zgjedhur të të trajtuarit të krahut të punës.
“Hoteleritë kanë sot kushtet më optimale që ka rajoni me TVSH 6%. I takon të ankohen vetëm se, nuk gjen kamarierë, pastrues e recepsionistë. Por kur shikon deklarimet e pagës minimale… Këto ia bëjnë vetes se ndaj janë futur edhe në vështirësi”, tha Rama.
Gjithashtu vuri theksin te sektori i ndërtimit.
“Kompanitë e ndërtimit kanë sot referenca shumë të ulëta të shitjeve, ndërkohë që shitjet reale i dimë shumë mirë se çfarë janë. Do t’i shikojmë edhe referencat. Është e papranueshme, e neveritshme që nga njëra anë të bëhen fitime marramendëse dhe të vazhdojë shfrytëzimi i krahut të punës. Ata janë njerëz që vënë në dispozicion krahët e tyre për suksesin e ndërtuesve dhe kanë familjet e tyre për të ushqyer”, tha Rama.
Më pas, ai paralajmëroi: “Nuk do të japim leje ndërtimi për kompani ndërtimi që deklarojnë paga 40 mijë lekë. Ky 40 mijë lekë është për industritë prodhuese në këtë fazë. Nuk do të qëndrojë 40 mijë lekë, deri në fund të mandatit do të shkojë 45 mijë lekë minimumi. Por ama këtyre ne do t’i financojmë pjesën e sigurimeve shoqërore e shëndetësore për diferencën e rritur që të kenë mundësi të stabilizohen”. /sarandacity.al/
