Rama, “paralajmërim” për ata sudentë mjekësie me mendje te Gjermania

Gjatë një fjalëmbajtje në Kongresin e Shëndetësisë, kryeministri Rama e vuri theksin te gara globale për mjekë, edhe kualitativë, ku sipas tij Shqipëria ka tregues entuziastë.

“Sot kemi të gjitha arsyet të themi se në fushën e shëndetësisë kemi një kapital njerëzor shumë më të mirëtrajtuar dhe me më shumë garanci për të sotmen dhe të nesërmen.

Në kushtet kur një garë shumë frenetike ndërkombëtare ka hyrë në një fazë të ethshme për të garantuar kapitalin njerëzor në funksion të shëndetit bëhet edhe më sfiduese për ne që të jemi në lartësinë e kësaj sfide të përgjithshme ndërkombëtare.

Të gjitha vendet kanë hyrë në një fazë ku nevoja për të siguruar personel shëndetësor po bëhet më therëse edhe si rezultat i plakjes së popullsisë.

Nga ana tjetër, ne e dimë shumë mirë nga vijmë, por duke ditur shumë mirë se ku duhet të shkojmë, jemi të detyruar të shtyjmë me forcë përpara në funksion të fuqizimit të këtij kapitali njerëzor”, tha i pari i qeverisjes.

Por ai tha se shteti nuk duhet të paguajë ata student mjekësie të cilët sa marrin diplomanën ia fusin për Gjermani.

“Sot, një student i mjekësisë paguan 1/16-ën e ksotos reale. Shteti dhe taksapaguesit nuk e bëjnë këtë që ditën që mbarojnë studimet dhe marrin diplomën e mjekut, ata të cilët financohen nga ky buxhet, të ikin dhe të shërbejnë në Gjermani.

Shteti shqiuptar nuk financon studimet për sistemin shëndetësor gjerman. Ky është një problem që shumë vende e kanë adresuar dhe ne ka ardhur koha ta adresojmë”, tha Rama.

Nga ana tjetër, kryeministri paratha rritjen e pritshme të pagave në Shëndetësi.

“Më 30 prill, mjekët specialistë do të fillojnë të marrin 50 mijë lekë të reja plus në pagën e tyre. Janë 500 dollarë plus në muaj, janë 6 mijë dollarë plus në vit. Rritje duke filluar nga 30 prilli, ndërkohë që do të mbajmë zotimin për rritjen 7% të mjekëve të përgjithshëm dhe për infermierët. Shpresojnë që mjekët specialistë të mos na kërkojnë dhe 7% plus mbi 50 mijë lekëshin.

Në ndërkohë edhe mjekëve të përgjithshëm dhe infermierëve po u themi që ne po përgatisim rritje proporcionale me këtë të mjekëve specialistë dhe shpresojmë shumë që në vitin 2024 do të kemi edhe për ta një rritje të ngjashme”, tha Rama. /sarandacity.al/