Kryeministri Rama përuroi bustin e Konstantinos Mitsotakisit në Derviçan, siç shkruan, “i pari kryeministër i Greqisë që vizitoi Dropullin, ku busti i tij do të qëndrojë si shembëlltyra e të vërtetës historike, se ajo që i bashkon qysh në lindje të kohërave popujt e vendet tona është përjetësisht më e madhe, se sa çfarëdoqoftë mund t’i ketë ndarë a ndajë përkohësisht, për arsyet e mosarsyes së politikës”. Kjo frazë e fundit vjen nga fakti se i biri, homolog i Ramës, Kyriakosi, nuk qe në ceremoni. Kuptohet, për Belerin.
Duke i konsideruar shqiptarët dhe grekët si popuj vëllezër, Rama:
“Mjafton ta kesh parë në një material arkivor të televizionit grek ku ai flet me sensin aristokratik të humorit, për kokëfortësinë e gruas së tij arvanitase. Kjo ushqen dhe lidhjen e pandashme mes dy vendeve tona, që e shkuara i ka përzierë aq shumë, saqë po mos t’i dallojë gjuha, asgjë s’i bën të pandashme.
Do të kisha dëshiruar që këtu të ishte sot Mitsotakis, por me siguri që ai do të kthehet në këtë shesh, pasi që nga sot sheshi mban emrin e të atit”, tha Rama.
Referuar “Beleri”-t, Rama tha se “politika elektorale trazon edhe rrjedhën e vëllëzërisë”, por theksoi se “gjithçka do të rregullohet”.
“Fatkeqësisht politika elektorale me nevojat e saj jodomethënëse për fatet e popujve tanë trazon edhe rrjedhën e natyrshme të vëllazërisë qysh në lindjen e kohërave.
Por janë gjëra që kalojnë edhe pse do të ishte mirë që të mos ndodhnin. Sic ishte mirë të mos ndodhin, por herë më lehtë edhe herë më vështirë kalojnë edhe sherret mes vëllezërit që jetojnë në një shtëpi.
Trazimet dhe keqkuptimet jo vetëm kalojnë, por e bëjnë edhe më me kuptim lidhjet e pandashme mes dy popujve dhe vendeve tona, për të cilat edhe dy kundërshtarët e paepur, Konstantinos Mitsotakis dhe Andrea Papandreou jo vetëm kishin të njëjtën bindje, por bënë çka mundën në kohën e shkurtër që patën pushtet në kohën kur Shqipëria sapo doli nga izolimi”, tha Rama. /sarandacity.al/
